теглар

31.07.2020

Ўзбекистондаги хитойлар билан


Дастлабки таассурот
Хитойликлар билан ярим йилча ишладим. Уларни тиришқоқ ва меҳнаткаш, хушчақчақ ва бироз муғомбир одамлар сифатида билдим.
 “Р”ни “Л”, “Т”ни “Д” деб талаффуз қилади, ундошлар кетма-кет келса, орасига унли қўшиб айтади,  “работа”ни “лобода”, “топограф”ни “добогылаф”, “каптива”ни “кабыдива” дейди. Ёшига нисбатан 8-10 йилга кичик кўринади. Деярли ҳаммасининг сочи тиканак.
Жуда вақтли уйғонади, кўп ухламайди. Инглизчани билади, аммо тушунарсиз талаффузи сабабли англаш жуда қийин. 5-6 йилдан бери ишлаётганлари русчани ўрганиб олибди. Бўш қолгани дарҳол “Хитойча-русча сўзлашгич”ни қўлига олади. Чунки уларда тил ўрганиш рағбатлантирилади, қанча кўп тил билса, маошига фоиз қўшилади. Баъзилари ўзбекча саломлаша олади, аммо тили энди чиқаётган бола каби эшитилади: асиоломалаекум.
Ичкиликни яхши кўрса-да, маст бўлиб тўполон қилганини кўрмадим. Ўзбекча айтганда “кўтаради”. Аёллар масаласида ўзини қаттиқ тийиб юради. Ўзбекистонда ишловчи россияликлар ўйнаш орттириши, фоҳишаларга бориши, эронилар вақтинча никоҳланиб олиши мумкин, аммо хитойларда бунақасини кўрмайсиз.
Овқатлари аччиқ. Суюқ овқат, суякли гўшт, йогуртгача қўшчўп ёрдамида жуда тез ейди. Овқатланишга атиги 5 дақиқа вақт сарфлайди, мева-чевани тик туриб еб қўяқолади. Бир куни электр ўчиб қолди. Бунақа вақтда ўзбек телефони чироғини дастурхонга тутиб бамайлихотир тановулни давом эттиради. Аммо хитойлар қоронғуда овқатланишга ўрганмаган экан. Ташқарига чиқиб симёғочнинг нури остида тик турганча овқатлана бошлади.
Овқат вақтида телевизорда фақат Хитой каналини кўради. Хитой телевиденияси ўзимизникидан қолишмас экан: зерикарли тарихий кўрсатувлар, креслога ўтирволиб суҳбат қуриш, мажлислар, концертлар... Си Жинпиннинг ҳар бир қадамини, сафарга кетиши ва қайтишини, фуқаролар билан учрашувини, турли иншоотларга ташриф буюриб йўл-йўриқ кўрсатишларини, аҳолиси унга пешвоз чиқишини тинмай кўрсатади. Мамлакатнинг 70 йиллиги нишонланди, телевизор бир ой концерту тантанадан бўшамади. Номига бўлса-да, инглизча кўрсатувига кўзим тушмади. Аммо тил билмасангиз ҳам хориж хабарларида тарафкашлик ва бирёқламалик сезилиб туради: Америка, ғарб ва Туркия танқид қилинаётганини, Россия, Сурия ва Эрон ҳақида эса ижобий тасаввур бераётганини тез пайқайсиз.
Хитойларнинг ҳар бир икир-чикирни кўздан қочирмай қаттиқ ишлаши, тиришқоқлиги немисларга ўхшайди. Бироқ Ўзбекистонда қонун эмас, таниш-билиш ҳал қилишига улар дарҳол мослашиб олган ва бу жиҳатдан ўзбекларга ўхшайди. “Дастурхон дипломатияси”ни, керак бўлса, биздан ҳам ўтказиб юборади. Эҳтимол, Хитойнинг ўзида ҳам шунақадир, бекорга коррупциялашган давлат ҳисобланмайди-ку. Аммо зеҳниятидаги бу камчиликни меҳнаткашлиги билан ёпиб тараққиётга эришгани эътиборга лойиқ.
Хитойлар бошқарув вертикалига қаттиқ амал қилади, бошлиғи ўл деса ўлади, тирил деса тирилади. Бир куни эртадан кечгача тайёрланди. Хизматчиларнинг қўли-қўлига тегмади. Ҳаммаёқ тозаланди, сўйилган бутун қўй келтириб, сергўшт овқатлар пиширилди. Катта бозорлик қилиб келди. Билсам, компаниянинг бош менежери келаркан. Хитойчилик ҳам ўзбекчилик каби экан деб турсам, хушомадгўйликда биздан ўтиб тушаркан. Дарвоза олдига ўнтача хитойлик ходим текис саф тортди. Менежер деганлари бўйи бир ярим метрли юмалоққина киши “Прадо”дан тушар-тушмас саф тортганлар қаттиқ қарсак чалди. Шу бўйи қуюқ базм бўлди. Яшавор, лаганбардорлар. Аммо бой давлат фуқароларига лаганбардорлик ҳам ярашаверишига нима дейсиз?
Бир куни Хитой телевидениясида 40-50-йиллар манзарасини кўрсатди: оқ-қора тасвирлар, узун кўйлак ва зарли камзул кийган, пешонабоғ таққан қизлар рақс тушяпти, чопон-дўппидаги эркаклар қарсак чалиб куйлаяпти, тахта бортли юк машиналар тутқатор оралаб дала йўлида юрибди. Худди “Мафтунингман” киносидаги тасвирлар дейсиз. “Итс жаст узбекс” деб ўрнимдан туриб кетдим, бир хитой “уйгур” деб изоҳлади. Уйғурлар ўзбекларга шунчалик ўхшашлигидан ҳайратдаман.
Уйғурлар муаммоси Хитой телевидениесида кўрсатилмайди, оддий одамлари мутлақо бехабар. Аммо Хитой маданиятига сингишиб кетган уйғурлар ҳам бор экан. Бир куни хитойлардан бири мусиқа каналида хитойча куйлаётган қисиқкўз бир қўшиқчини кўрсатиб ўз тилида алланималар деди. Аввалига эътибор қилмадим, кейин билсам, менга қарата “қўшиқ айтаётган одам уйғур” деётган экан.
Маош ва маданият
Бир куни уларнинг биттаси билан билан анчагина гаплашдим, Хитой, унинг маданияти, сиёсати ҳақида ўзимни қизиқтирган саволларни бердим. Айрим жавоблари мени ҳайрон қолдирди, қарашларимга соя солди. Айтиб ўтишим керакки, суҳбатдошим олий маълумотли, ўрта поғонага мансуб раҳбарлардан, ёши қирқдан ошган. Рус-инглиз тилида аралаш суҳбатлашдик. Бир бошдан баён қиламан.
-                Русчани қаердан ўргангансиз?
-                Ўзбекистонга келиб ўрганганман. Ҳозир русчада (кўзини юмиб клавиатура тергандай ҳаракат қилди) мана бундоқ ҳам ёза оламан.
-                Сизларнинг компаниянгиз давлатникими ёки хусусийми?
-                Давлатники.
-                Қанча маош беради?
-                Ҳар хил олади. Масалан ёш мутахассислар 800-1000 олади (долларда).
-                Ўзингиз-чи? Хитойда қанча оласиз, бу ерда қанча?
-                Хитойда офисда 1500-2000. Айрим компаниялар ундан ҳам кўп тўлайди. 3-4 минг оладиганлар бор. Аммо дала шароитида ишласангиз яхши тўлайди. Шунинг учун ишлаймиз.
-                Чет элда ҳам нефт-газ қидирганмисизлар?
-                Албатта. Ўндан ортиқ давлатда ишлаганмиз. Араб давлатларида, Африкада, Покистонда бўлдик. Покистонда 5-6 минг долларгача маош олдик, чунки у жойлар хатарли. Ҳарбийлар кузатувида юрдик.
-                Компаниянгиз кўп жойларда ишлаганми?
-                Ҳозир дунёнинг 50та давлатида икки юздан ортиқ лойиҳалари ишлаб турибди.
-                Нимага уйғурларни жуда кўп қамашяпти?
-                Биласизми, у ерда террорчилар бор. Одамларни сўйиб ташлаган. Давлат террорчиларни ҳибс қиляпти, яхши одамлар эркин юрибди. Уруш ҳеч кимга керак эмас, Хитой тинчликпарвар давлат.
-                Гонгконгда қачондан бери намойишлар бўляпти, гонгконгликларни қамамаяптику.
-                Гонгконг – алоҳида давлат, уларнинг ички ишига аралашиб бўлмайди. Синзян эса Хитойнинг ичида.
У Хитойда яшаш жуда қимматлигини, иккита фарзандини ўқитиш харажатлари ниҳоятда юқорилигини, одамлар уй сотиб олиш учун умр бўйи ишлаб кредит тўлашини гапириб берди. Қайнона-қайнотаси билан бирга яшаркан, чунки ўзининг ота-онаси, қайнона-қайнотасининг эса бошқа фарзандлари йўқ экан. Уйининг расмини кўрсатди. Икки қаватли коттежсимон уй, панжарали девор ўралган ҳовлича бузоқнинг тилидек энсиз ва тор. Аммо иморат бежирим, ичкарисида ҳамма шароит бор, худди меҳмонхоналарга ўхшайди.
У билан Хитой раислари ҳақида ҳам гаплашдик. Си Жинпинни русчада улар президент ёки началник, деб тилга олади. Маълумки, Хитой давлатининг ўзи дунё ичидаги алоҳида дунё. Бизга яхлит монолитдек сезиладиган бу давлат ичида ҳам турли тоифалар, элатлар бор. Суҳбатдошим Ли буни тасдиқлаб, хитойликларнинг интеллектини ҳудудий фарқлаб берди. Энг ақлли хитойлар жанубда яшовчилар, шунинг учун барча “началник”лари жанубликлар экан. Шимол ва шарқдагилар ўртача, энг нофаол одамлар ва қолоқ минтақа ғарбий Хитойда экан.
Мен унинг Мао Цзедун ҳақида ҳам фикрини сўрадим. У ёки “камолотчи” ёки сир бой беришни истамайдиган одам – Мао ҳақида бирор нохуш гап айтмади. Аксинча, “началник”ларга жуда қийинлигини, улардан кўп нарса талаб қилиш эмас, уларга ёрдам бериш кераклигини, одамлар меҳнаткаш бўлса, мамлакат ривожланишини айтди. Шунда Маонинг нотўғри сиёсати сабабли миллионлаб фуқаролари ўлганлигини айтдим, бироқ бу гапларим унда таажжуб уйғотмади ва Маога нисбатан беҳурмат гап чиқишига сабаб бўлмади.
Суҳбатдошим Ли Ўзбекистонда кўп йиллар ишлаганлиги боис вилоятларимиз одамларининг характеридаги ўзига хосликларни ҳам фарқлаб олибди. Бухороликлар тадбиркор, водийликлар меҳнаткаш, тошкентликлар жуда културний, деди. Орол денгизи тарафдагилар кўп ичишади, уларни ишлатсак, алкотестер керак, Фарғона, Наманганда эса алкотестер умуман керак эмас, деб кулади.
У билан суҳбатимиз конкрет мавзуларда бўлганлиги сабабли айрим ишонувчанларни кўпроқ қизиқтирадиган “хитойлар ҳомилани ейдими?”, “одам гўштини пештахтага илиб қўйишадими?” қабилидаги саволларни бериш бутунлай ноўрин эди. Гўёки, бу саволларни берсам, у менинг даражамдан куладигандек. Чунки унинг хатти-ҳаракатлари ва ўзини тутиши бунақа саволга ўрин қолдирмаганди.
Бошқа компанияларда хитойлар билан ишлайдиган танишларим уларни жуда маданиятсиз дея таърифлади. Эҳтимол. Бир халқнинг орасида ҳар хил тоифа одам учраши мумкин. Хусусан, дунёдаги энг кўп сонли халқнинг ичида. Аммо мен таниган хитойлардан ўрганса арзийдиган жиҳатлар бор эди. Хитойларнинг тиришқоқлиги, прагматизми, тажовузкор эмаслиги, омилкорлиги, синчковлигининг гувоҳи бўлганлар бу чумолидай меҳнаткаш, қўйдек ювош одамчаларни ёмон кўра олмайди. Оқлари корейс ва японга, қорачалари ўзимизнинг қозоқ ва қирғизларга ўхшовчи бу бир ярим метрли одамлар агар маҳаллий аҳолини ишлатса, ҳақини беради ва алдамайди. Кимгадир ёлланиб ишласа, сидқидилдан ишини адо этади.
Маҳаллий база ҳудудини тозаловчи фаррош қизларга хитойлар 1,5-2 млндан (150-210$) маош тўлагани учун улар эртадан кечгача куймаланиб юришарди. Чунки хитойлар келишидан олдин маҳаллий иш берувчи бор-йўғи 500 минг сўм иш ҳақи тўларди. Ишчилар лойиҳа тугашидан ва уларга катта маош бераётган хитойлар кетиб қолишидан ташвишланарди. Озиқ-овқат, иш кийими ва ётоқ иш берувчи ҳисобидан. Аммо, хитойлар яхши тўлаганига яраша қаттиқ ишлатади. Ўзбекистондаги каби меҳнат имтиёзлари, ҳафтада 1-2 кун дам олиш, 8 соатлик иш вақти, “оғайнилар билан гап”ни эсдан чиқариш керак. Шунга қарамай, хитой компаниялари олдида ишга кирувчилар ҳамиша сероб бўлади. Чунки чекка ҳудудларда малакасиз оддий ишчига 2-3 млн сўмлик (210-310$) маош тўлайдиган ҳотамтой йўқ ҳисоб.
Таъкидлаб ўтаманки, бу мен кўрганларим. Бошқа ерда бошқача бўлиши мумкин.
Хитой ва ўзбек: фарқ ва ўхшашлик
Хўш, хитойларни ишлаб чарчатмайдиган мотивация нима? Менимча, улар кўз ўнгида давлати тараққий этаётганидан, ишлаб натижасини кўриши мумкинлигидан руҳланади. Яхши ўқисам, тиришиб ишласам роҳатини кўраман, деб ҳисоблайди. Шу боис бўлса керак, сиёсатга қизиқмайди, тизимнинг қаттиққўллигига кўзини юмади, фикри зикри яхши яшаш. 60-йилларда Хитойда миллионлаб одамни олиб кетган очлик, маданий инқилоб қурбонларини ўз кўзи билан кўрган ота боласини яхшироқ шароитда ўстиришга интилиши табиий. Набираси эса янада яхшироқ таълим олади ва яшайди. Асрлар бўйи оддий фуқаронинг илигини қуритган очлик муаммоси аллақачон ҳал этилган. Сун бобо тепкили мосламада зовурдан сув тортиб шоли етиштирган бўлса, Сун Чжан фабрикада ишлайди. Чжан Ван эса программист! Борган сари ҳаёт яхшиланаётганлигини кўришдан каттароқ мотивация бўлиши мумкинми? Улар ҳукумати тўғри йўлда кетаётганлигига шубҳа қилмайди.
Ўрни келганда айтиш керакки, бизда бундай эмас. Пулининг ҳидидан ухлай олмайдиган қатламнинг боласи “пулга сотилмайдиган нарса йўқ” ақидасида улғаяди. Қуйи қатламнинг фарзанди эса “гугурт бир тийин бўлган дориломон замонлар” ҳақида катталардан эшитиб ўсган. Энг яхши мураббий тарихдир, энг яхши мотивация ўрнакдир.
Ўзбекистон ҳақида сўз борганда кўпчилик консерваторча урф-одатларимиз, таниш-билишчилигимиз, маросимбозлигимиз, ошхўрлигимизни тараққий этишга тўсиқ дея, пессимистик хулосалар тақдим этади. Аммо мен ҳозирги ҳолатимизда ҳам дунё рақобат бозорига чиқишимиз ва тўкис яшашимиз мумкин, деб ҳисоблайман. Бунинг учун дунёда етакчи миллатлардан билимдонлик, ишбилармонлик, тиришқоқлик, пухталик сингари хусусиятларни “юқтирсак” бўлди. Ишни қойиллатиб қўйганингиздан сўнг, озгина “ўзбекчилик” бўлса, нима қилибди? Ўйланг: қойилмақом рус инженерини ишлатсак, ичкиликбозлигига кўз юмамиз; ҳиндга программа туздирганимизда унинг неча марта ювинишини сўрамаймиз; корейслар билан ҳамкорлик қилганда уларнинг итхўрлиги бизга умуман аҳамиятсиз. Шундай экан, биз ўзбекларда ҳам айрим камчиликлар бўлиши табиий, фақат дунё бозорида буюртмачи-ижрочи муносабатини сидқидилдан адо этишимиз лозим холос.
Қайсидир маънода ўзбеклар билан хитойлар ўхшаш. Улар россияликлар каби бизга юқоридан қарамайди, итоаткор ва сертакаллуф. Бироқ барибир Хитой давлатига яқинлашишга қаршиман. Аслида Хитой давлати куч-қувватга тўлиб кичик давлатлар учун тобора хавфли бўлиб бораётгани ҳақида кўп ёзишяпти. Мен ижтимоий-иқтисодий оқибатларига тўхталмоқчиман. Биласизми, улар шу юмшоқлиги билан ҳам хатарли. Улар сизга “катта оға”нинг кибри билан “чойдан қуй”, демайди, аксинча, чойни ўзи қуйиб тавозе билан узатади. Фақат иккинчи пиёлани ўзиникига узатади, кейин чойнак ҳам пиёла ҳам унга ўтиб кетади, пиёлани бўшатмасингиздан ўзингизни хитойлар қуршовида кўрасиз. Агар давлатимиз Хитойга яқинлашишда давом этса, йирик тармоқларнинг бари хитойларга ўтиб кетади. Ўтган асрдаги Малайзиядаги малайларнинг ҳолатига тушамиз. Гап, нафақат Хитойнинг иқтисодий қудратида, балки хитойларнинг туғма ишбилармонлигида. Агар маркетингда пихини ёрган хитойлар бозоримизни эгалласа, бармоғининг учида ўйнатиши мумкин. Ҳа, улар замонга мослаша олди, кирган жойидан фойда билан чиқишни ўрганди. Бунга жуда қисқа вақтда эришди. 30 йил аввал жон бошига ЯИМ бўйича биздан орқада эди, ҳозир қарийб уч баравар олдинлаб кетган. Биз анчагина кеч қолдик. Давлатимиз ҳам, одамларимиз ҳам. Келинг, мақоламни позитив руҳда тамомлай. Аммо ҳали барчаси қўлдан кетгани йўқ. Фақат билим, тиришқоқлик, ишбилармонлик бизни қутқаради.
2020 йилнинг июл ойи

31.10.2019

Музейдаги сўзлар


80-йилларда “Ёшлик” журналида “Тил сандиғи” номли рукн бўларди. Асосан, луғатга кирмай қолган шевага хос, эскирган сўзлар маъноси изоҳлаб бериб борилган. Хўш, бу нимага керак? Тил жонли нарса ҳисобланади, у доимий ўзгаришда, ривожланишдадир. Ҳозир тилимизга чет сўзлар селдек кириб келмоқда. Ҳаттоки, ўзбекча муқобилини жойидан турғазиб, ўрнига алтернатив бўлиб ўтириб қолмоқда. Бу табиий жараёнда меҳмон сўзлар мезбон сўздан зўр чиқиб қолмаслиги учун шевалар ва тарихий сўзларимиздан, яъни илдизлардан озиқланишимиз тўғри бўлади.
Мен Қўқон шаҳри ва унинг атрофидаги туманлар аҳолиси оғзаки нутқда ишлатадиган, аммо адабий тилга унчалик кирмаган сўзларни тўплаб юраман. Марҳамат, ўқиб кўринг, таниш сўзлар учрармикан.

Аллоли – атайлаб, тезгина (азза-базза)
Арвак – кичкина, нимжон, қилтирик (арвоҳдан чиққан бўлса керак)
Бакор келмоқ - фойдаси тегмоқ
Вавақ, вавақча – лўппи юзли дўмбоққина гўдакларни эркалаб чақириш
Вала-вала – сергап, жаврақи одам; Вала-вала қилма – кўп гапирма.
Валангор – бузилган, ишга яроқсиз, абгор; ҳаммаёғи очиқ
Валиш - ишком
Дагар – ўғил болани шундай эркалатишади
Данап - тўйда рақсга тушувчи аёл (баъзи жойларда енгилтабиат деб таърифланади)
Даршана – эрта баҳорда маҳалла кўнгилли равишда тўпланишиб ариқ-кўчаларни тозалаш, дарахт экиш ҳашари
Дўмбаслик - дўнглик, баландлик
Гармашўрак – пишириб, устига пиёз ва зираворлар солинган нўхат
Жазвар, жазбар – чизғич, линейка (ўқув қуроли)
Жипириқ -
Зибир – зовур (сбросдан келиб чиққан)
Ичи чиқмоқ – кўнгли тўлмоқ
Капасассиқ – “старческий маразм”га учраган одам
Каранда - олифта, такаббур
Карилламоқ – катта кетмоқ
Кирпи - типратикан
“Кўча” – маҳаллий мафия
Кўчаош – гўжа ош, оқжўхоридан тайёрланган суюқ овқат, иссиқ ҳолда устига кўк сепиб тортилади (айронлиси эмас)
“Кўчат” – емлашга тайёр ёш мол
Лахтипар, лағар – бузуқ, яроқсиз, хароб
Малда, малданон – қозонда қатлама каби юмшоқ қилиб пишириладиган сўлқилдоқ нон
Мондалаб – эплаб, уддалаб
Найниғ – майнавоз, найрангбоз
Нинни – чақалоқ, гўдак
Обрез – хона четидаги ювинадиган жой, суви ташқарига оқиб кетади
Олатоғ – қаердалиги номаълум тоғ. – Қаёққа кетди? –Олатоққа.
Опой - аёл ўқитувчи ёки тарбиячини чақириш
Ордиқ - дам олиш куни (ҳордиқ ёки отдых дан келиб чиққан бўлса керак)
Оғзи қаттиқ - одатда баланд нарх айтувчиларни шундай сифатлашади
Палла - сигирнинг туққандан кейинги сути, овуз, ўвуз сути
Пасод, фасод – инжиқ
Пинна – инжиқ, фитначи феълли инсонга (асосан аёл) нисбатан ишлатилади
Пойчўкир - хокисор, камтар одам
Полпис – бефаросат, бесаранжом
Посон бўлиш– башанг, кўркам кийиниш
Пудаш - пуфлаш
Пўтақари, ке(к)сақари - маҳмадона болакай
Самовар – чойхона
Сарофта - бозор-ўчар (сарфи ҳафтадан келиб чиққан)
Сепсилиш - камайиш
Тева – тепа
Увдиқ -
Фалон-пукун – фалон-пистон
Хопитиш – чўмилиш
Хоҳладим - ЗАГС
Хоҳлашган - севишган (қиз билан йигит)
Хутум – ичиқора, ҳасадгўй, фитнакаш
Чикалак ошиш – ўмбалоқ ошиш
Чикалтак – ёш кўчат
Чойдиш - қумғон
Чули-чули – майда-чуйда, ҳисобдан ташқарида, дегани
Шапшак - шўх, шум
Энахотин - маҳмадона қизчаларни аташади
Қашамшанг - безбет
Қир учи – энг тепа жойи
Қирпи – туллак, пихини ёрган (асосан эркак)
Қўмақай - сут кўп эмадиган дўмбоқ гўдак
Ғўжалоқ – кир-чир
Ғишава – хархаша, инжиқлик
Ҳилқинмоқ – бировнинг нарсасига ютинмоқ, кўз олайтирмоқ
Ҳовдир – ҳовлиқма, довдир

30.09.2019

Ўзбеклар нима дейди?


Дин ҳақида: - Одамнинг манетида бўлсин (кўкрагига уриб), вей!
Бойлар ҳақида: - Мард киши. Эҳсони катта саховатли одам. Ҳожи. Бир тўй қилди ўтган йили, тўкиб ташлади, келганам келди, келмаганам келди.
Уччига чиққан таниш-билишчи ва порахўр ҳақида: - Ҳожатбарор одам. Ҳозирги замонда танишсиз иш битиролмайсан. Бир суҳбатини ол, керак бўлиб қолади.
Ёғли овқат ҳақида: - Дўхтирлар ваҳимачи халқ бўлади. Катта-катта олавер.
Ичкилик ҳақида: - Ўзимас, кайфи ҳаром. Икки ака-ука бўлган экан (давомини биласиз).
СССР ҳақида: - (орзумандлик билан) Бошқача даврлар эди. Гугурт икки тийин. Бир сўмга, эҳҳе..
Америка ҳақида: - Иплос давлат. Ҳамма уруш ўшағдан чиқади.
Тошкент ҳақида: - Свет ўчмайди, газ бир метр.
Мустақиллик ҳақида: - Ҳозир ҳам кам бўлганимиз йўқ. Ишлаган қандини уриб яшаяпти.
Тўйлар ҳақида: - Ярашиғи шунақа. Маҳалла-кўйдан кам ё ортиқ жойимиз йўқ.
Газеталар ҳақида: - Афандиси, сканворди боридан олиб тураман.
Китоб ҳақида: - Ўқиб шаҳар оберармиди. Кўряпмиз ўқиганларни.
Қиз фарзанд ҳақида: - Ўқиб шаҳар оберармиди. Кўряпмиз ўқиганларни.
Интернет ҳақида: - Ҳозирги болаларнинг ҳаммасининг, нимейди, анави, ҳа аднўда сайти бор.
Алишер Усмонов ҳақида: - Путин билан яккама-якка гаплашиб, Россияда ўзбекларга тегмасликка келишиб қўйибди.
Элон Маск ҳақида: - Ким у?
Масжид ҳақида: - Пенсияга чиқиб олай, Худо хоҳласа, намозни канда қилмайман.
Сиёсат ҳақида: - Кетни қисган бой бўлади. Сиёсатга аралашма. Ундан кўра уят-уят гаплардан гаплашайлик.
Президент ҳақида: - Ўзи яхши одам, атрофидагилар ярамас.
2019 йилнинг сентябри

21.08.2019

Ўзбек АЭСи ва муносабатлар географияси

- Кечирасиз, сиз Европада яшайсиз-а?
- Ҳа, шундай.
- Демак, АЭС қурилишига қаршисиз. Сиз бўлса, Америкада яшардиз?
- Ҳа.
- Сиз ҳам АЭСга қаршисиз. Сизнинг касбингиз, адашмасам, филолог эди?
- Ҳа, мен филологман. Манфур Сталиннинг 37-йилларда миллатимиз зиёлиларини қирғинини тадқиқ қилиб...
- Бўлди, тушунарли, сиз ҳам АЭСга қаршисиз. Бирад, сиз Россияда ишлармидиз? Ҳа, сизни айтяпман, ҳой, салафан сумкали, ака.
- Гастарбайтерман, дакументизга шунақа ёзовринг.
- Тушунарли, сиз АЭС қурилишига “за”сиз?
- Бўмаса-чи. Қишлағда сивет йўқ, одамлар ҳарна токли бўпқоларди. Газ йигирма йилдан бери йўқ, ўтинам тугаяпти, овқатни плитада пиширамиз. Сивет ўчмаса, сув ҳам чиқиб туради, у-бу экамиз-да.
- Кепкали йигитча, сиз Хитойда ўқийсми?
- Студентман.
- Ҳмм, сиз ҳам АЭСни қўллайсиз, шунақами?
- Ҳа-да, энергетика мамлакат иқтисодининг қони-ку. Хитой бир йилда юзта АЭС қуряпти, тириқ этгани йўқ. Энергетикасиз тараққиёт йўқлиги бугун кўргаям аён-ку.
- Соқолли ака, сизнинг фикрингиз биз учун қизиқ.
- Авваламбор, ибодатни унутдик, кайф-сафога берилдик, уммат хору зор бўлди. Америка оқ ит бўлса, Россия қора ит дейишлик...
- АЭСга нима дейсиз, оға?
- Икки зарар бирдан келса, зарари камроғини олиш жоиздир.
* * *
Бу масалада мутахассисларнинг фикрини кутяпман ҳалигача.

13.06.2018

Мен қамчини севаман, менга зуғум ёқади

(2018 йилги блогерлар чемпионатининг 3-босқичи учун ёзилган)


Финалга етиб келган блогер дами чиққан пуфакка, заряди тугаган батареяга ўхшайди. Тишининг ковагидаги мавзуларини ёзиб бўлган, энди бошқа топиш керак. Энг эсда қоларли блогпостлар дастлабки босқичларда кузатилиши сабаби шудир, эҳтимол. Буни, кўпчилик эътироф этса керак. Хусусан, 2-босқичда биринчи ўринни олган Исроил Тиллабоев “Биринчи блогпостни финалгача сақламайсанми, аҳмақ”, деб ўзига хос тарзда танбеҳ берган эди. Ким билиб ўтирибди, дейсиз. Дарвоқе, билмаслик ҳақида гап кетди. Билганларим ҳақида эмас, билмайдиган нарсаларим ҳақида ҳам ёзиб кўрайчи.

Олдиндан айтиб ўтишим керакки, бу сафарги мавзу эркинлик эмас, зеҳниятимиздаги қаттиққўлликка мойиллик ҳақида. Муаллиф эркинлик тарафдори сифатида доим норози постлар ёзиб давлат сиёсатини танқид қиларди, энди бошқача фикрлаб қолибди, десалар дейишсин.

Сиёсатшунослик ва жамиятшуносликка оид яхши мақолалар эълон қилган, Европада илмий иш билан шуғулланаётган толиби илмга бир вақтлар берган бир саволимга жавоб ололмаганман. “Одамларни қандай қилиб тезлик билан тартибга ўргатса бўлади? Жамиятнинг онгини ошириш керакми ёки кескин (баъзида адолатсиз) чоралар кўрилиши тўғрими? Энг тартибли ва қонунга итоаткор кишилар ривожланган ғарбдадир. Тўғри, улар маданиятли, онги юксак этиб тарбияланган. Аммо 80 йил олдин ўртоқ Сталин даврида ҳам одамлар кучли тартибга ўргатилганди. Европаликлардан фарқли равишда ярим оч, саводхонлиги паст аҳоли қаттиқ жазодан қўрқарди. Айтингчи, тезлик билан тартиб ўрнатишга тўғри келса, қайси йўлдан юрардингиз?”. У йигит “буни алоҳида мақола қилиш керак”, деди, аммо ёзмади, шундай қилиб бу саволнинг жавоби менга қоронғулигича қолди.

Фараз қилинг, тиғиз кўчанинг четини одамлар қўлбола “стоянка” қилиб олган. Стол қўйиб писта-қурут ҳам сотишади. Аммо бир куни “стоянка”нинг ёнидаги бино нақ майдонча устига қулиб тушиши эҳтимоли аниқланди. Маҳаллий ҳокимият огоҳлантирувчи ёзув илди, махсус белги осди, тўсди, маҳаллий посбонлар аралашди. Одамлар ёзувга қарармиди – машина қўйишда ва савдо қилишда давом этди. Шунда ҳокимият дубинкали ўнта милиционерни жалб қилиб машиналар ва одамларни куч билан чиқариб юборди. Шу тариқа катта фожеа олди олинди. (Бу бир мисол, тўғри, ҳозир давлат бирор янгилик киритса, одамлар тагида бир балоси бор, деб шубҳаланади, аммо у бошқа мавзу). Ёки ҳайдовчи камарини олинг, шофёр зоти борки, мелисани кўргандагина тақади, ҳолбуки у ўзининг саломатлиги учун керак. Мен ишлайдиган ташкилот ходимларини ҳар йили мажбурий тиббий кўрикдан ўтказишади, аммо одамлар шуни ҳам четлаб ўтиб, беш-ўн сўм эвазига “справка” олиш пайида бўлади. Ҳа, одамларни мажбурламаса, бошқалар тугул ўзига яхшиликни раво кўришни ҳам бас қилиб қўярмикан, деб ўйлайсан киши.

Бугун ғарб маданиятидан таъсирланган зиёлилар сиёсий эркинликлар, либераллик, дахлсизлик, плюрализм каби тушунчаларни шарҳлаётганини, уларнинг давлатчиликдаги аҳамияти ҳақида ёзишаётганини тез-тез учратамиз. Буларнинг барчаси зарурлигига шубҳа йўқ, аммо шартли равишда бўлинган шарқ ва ғарб давлатлари етакчиларининг сиёсий қиёфаларини таққослаб, шарқда муваффақиятли автократ лидерлар оз эмаслигининг гувоҳи бўламан. Келинг, шарқ давлатларининг “қамчиси бор” етакчиларига назар солайлик. Мустафо Камол Отатурк (Туркия), Оятилло Ҳумайний (Эрон), Пак Чон Хи (Жанубий Корея), Махатхир Муҳаммад (Малайзия), Ли Куан Ю (Сингапур) ва бошқалар. Уларнинг ҳеч бирини либерал ёки демократ деб бўлмайди, ҳаттоки, диктатор деб сифатлашади. Улар ҳам ўзига ёқмайдиган фикрни бўғган, мухолифатни репрессия қилган, ўзининг танқидчиларини аяб ўтирмаган, ОАВ устидан назорат ўрнатган, қисқаси қўлидан қамчисини қўймаган. Аммо қаттиққўллик билан бўлса-да, ислоҳотчи лидерларнинг эришган юксак натижалари эътирофга лойиқ, зотан уларнинг учтаси мамлакат иқтисодини “Осиё йўлбарси” даражасига кўтарди. Биз қизиқ одамлармиз, мажбурламаса, натижа бермаймиз чоғи. Зеҳниятимизда “етакчи қаттиққўл бўлиши керак” деган ақида сингиб кетган, ҳаттоки, юмшоқ табиатли етакчига бўйсунгимиз келмайди. Айниқса, псевдоанархиядан кейин ҳозиру нозир бўлувчи автократияни хуш қаршилаймиз. Ҳа, мундоқ раҳбарга ўхшаб бир сўкса, бошқа гап экан. 2016 йилнинг сўнгида президент Шавкат Мирзиёев вилоят ҳокимлари халқ томонидан сайланишини таклиф қилди. Тўғри, бу янгиликдан хурсанд бўлдим, чунки тайинланган шахс тайинлаганнинг, сайланган шахс эса сайлаганларнинг иродасига қараб иш тутади. Аммо бу ислоҳотнинг меваси кечпишар деб биламан, чунки сайлаш малакаси йўқ одамларимиз ё бир артистмижоз ваъдабозни, ё супертанишбилишчини ё бўлмаса ҳеч кимнинг дилини оғритмайдиган мўмин-қобил кишини сайлаб қўйишади ва кейин “раҳбар дегани қаттиққўл бўлиши керак”, деб ғудраниб юришади. Афсуски, бизнинг ҳар қандай раҳбарни диктаторга айлантирувчи “қудратимиз” бор.

...Яна бир гап. Мухолифатдаги собиқ депутат Пўлат Охуновнинг ёзишича, биринчи президент Ислом Каримов умрининг охиригача лавозимда қолишига сабаб Наманганда таъқиб ва қатағон қилинган диний фаоллар учун жавобгарлик хавотири бўлган. Тасаввур қиляпсизми, агар 91-92 йилларда Наманган тартибсизликлари рўй бермаганда, диндорлар бу қадар қаттиқ қатағон этилмасди, журналистлар эркинлиги бўғилмасди. Эҳтимолки, 90-йилларнинг эркинлик ҳавоси ҳуқуқий онгимизни юксалтириб қўйгач, президентга лавозимни бўшатиш ҳақидаги бош қонунни эслатишга иродамиз етган бўларди. Ва бугунги ислоҳотлар ўн беш йил олдин бошланарди. Пуллар ўмарилмаган, “каламуш”лар урчимаган, “симёғоч ҳам қамалмаган”, таълим тизими тўғнамаган бўларди... Яна ким билади, дейсиз.
2018 йилнинг 10 июни

30.12.2017

Ҳавоза (леса)

Яқинда ҳавоза (леса) ясаттирдим. Расмдаги эмас, бошқача. Озгина тўпорироқ, аммо пишиқ. 3-4 одамни ҳам кўтаради. Сувоқчилар ва бошқа турдаги усталарга керакли нарса. 5 дақиқада йиғиб ишлатаверасиз, бир-бирига кийилади. “Детский конструкция”га ўхшаш.
Ҳавозанинг бир комплектининг бир кунлик ижараси 1,5 минг сўм туради. 10 комплекти 15 минг. Бир ойда 450 минг. Дам олиш кунлари чиқариб ташланса, 400 мингча топиш мумкин.
10 комплект ҳавоза 3600000 сўмга тушди. Агар 2-3 комплект ясаттирсам, 7200000-108000000 сўмга тушарди. Мутаносиб равишда ҳисобласак, уларни ижарага бериб ойига 800-1200 минг сўм топиш мумкин.
Бизда олий маълумотли мутахассислар давлат ишида одатда 1,3-1,6 млн сўм маош олади. 1 млн оладиганлари ҳам топилади. Янги ишга кирган ёш дўхтир, ўқитувчи, инженерлар шарт-шароитга қараб ойига 500-700 минг олади.
Ўйлаб кўрсам, миллионлаб пул сарфлаб 4-7 йил ўқиган олий маълумотли мутахассис 8-10 млн сарфлаб йигирма кунда ясалган ҳавоза билан бир хил миқдорда пул топар экан.
Агар “ишлаб топаётган маблағинг жамиятга келтираётган фойдангнинг баҳосидир” деган мезон билан ёндашсак, янада истеҳзоли хулоса чиқади: 200 метр темир-терсак олий маълумотли мутахассис билан тенг фойда келтиряпти.
PS. Ҳавоза ясаттирганим рост. Керак бўлса, шахсийга алоқага чиқинг.
2017 йилнинг 11 октябри


31.12.2016

Уч китобни ўқиб

(тақриз деса ҳам бўлади)
Охирги пайтда сиёсий хабарларга қизиқишим ошиб кетганлиги сабабли бадиий китоб ўқишни ташлаб қўйгандим. Яқин ойлар ичида ҳафсала қилиб Амина Шанликўғлининг “Хитой қийноғи” асарини, Абдуқаюм Йўлдошевнинг “Пуанкаре” ҳикояси ва Робиндранат Тҳокурнинг бир тўп ҳикояларини ўқиб чиқдим.
Шу китоблар тўғрисида 2 оғиз.

Туркиялик Амина опанинг “Хитой қийноғи” асари уйғурлар юртида коммунистик тузум ўрнатилиши воқеалари ҳақида ҳикоя қилади. Асар қаҳрамони Каан тақводор мусулмон, аммо унинг оиласи бошига янги тузум кўп кулфатлар солади. Ўзи қамалиб коммунистик тузумнинг минг бир азобларига дучор бўлади. Қисқача мазмуни шундай.
Асар ниҳоятда сентименталистик руҳда ёзилган. Муаллиф аёл киши эканлиги сабаб бўлса керак. Баъзи жойларида автор ҳатто ёвуз қаҳрамоннинг ёқасидан силтаб ураётгандек, қарғаётгандек тасаввур ҳосил қилади. Шу билан бирга асарда инсонийлик, диёнат улуғланади, ёвузлик ва зулм қораланади. Айрим тасвирлари ишончсиз. Сталин лагерларида бўлган ёзувчиларнинг (Саид Аҳмад, Шукрулло) китобларига ўхшамайди, бошидан ўтказган одам барибир ишончли ёзаркан деган фикрдаман.
Бу китобни ўқиганлар коммунистик тизим ҳақида шу асарга асосланиб узил-кесил хулоса ясаб юбормасликларини истар эдим. Чунки сиёсий тизимлар ва тарих ҳақида бадиий асарга асосланиб ҳукм чиқарилмайди. Бадиий асар ўқувчининг туйғуларига қаттиқ тегади, улар билан ўйнашади, умуман шу мақсадда ёзилади. Биз коммунистик тизимга Шанликўғли, Шукрулло, Солженицин асарлари орқали қарасак зулматдан бошқа нарсани учратмаймиз. Совет ёзувчилари Горкий, Абдулла Қаҳҳор, Ойбек, Ғафур Ғулом ва бошқалар асарлари орқали бунинг бутунлай тескарисини кўришимиз мумкин, асли социализмнинг иқтисодий ва ижтимоий соҳадаги ютуқлари бисёр. Хитойчани билмайману, осмоностида ҳам коммунистик тизимнинг ютуқларини куйловчи адиблар сони мингдан ортиқ бўлса керак ва уларнинг барча қарашларини узил кесил рад этиб бўлмайди, албатта.
Бадиий асар муаллифи бирор воқеликни тасвирлар экан сиёсийликка қанча урғу бермаса, шунча яхши бўлади, назаримда. Асарнинг умри узаяди. Ёзувчи умуминсоний мавзуларда ёзиши керак, ўрнатилган мафкуранинг хизматкори бўлиб қолмаслиги керак, деган гапларнинг мағзи кўп.

Энди “Пуанкаре” ҳикояси ҳақида. Ҳажман кичикроқ қиссага тенглашадиган бу ҳикоя ўзбек адабиётида шов-шув бўлганини эшитгандим, аммо ўқишга қунт қилмай юргандим. Бу ҳикоя қийин математик гипотезани ҳал қилишга аҳд қилиб умрини бағишлаган математик (ўзбекистонлик) ҳақида. Ҳикояда ҳозирги кунларимиз тасвирланган. Математик қарорида қатъий, аммо турмуш муаммолари уни батамом енгиб ташлайди. Иқтисодий муаммолари, оилавий-маиший масалалар билан чалғиб фанга вақт тополмайди. Ҳозирги кунда илм йўлига кирган одамларга иқтисодий етишмовчиликлар ҳануз ҳамроҳлиги (ҳозирги кунларда Фанлар академиясининг айрим институтлари тугатилаётганлиги)  ҳикоянинг машҳурлигига сабаб бўлса керак. Ҳар ким асардан ўзини қидиради, топса эътироф қилади. Ҳикоя Улуғбек Ҳамдамнинг “Мувозанат” романини эслатади. Ҳикояда бутун бир авлод умрини ифодаланган, шу билан бирга замонавийлик ҳам бор (интернет, эмайл). Ҳикоянинг охирига етмасдан якунини тахмин қилдим (иҳм, иҳм:), чунки серсоқол Григорий Перелман ушбу гипотезани исботлаганини ва мукофотдан воз кечганини АиФда анча йил олдин ўқигандим. Хуллас, фан билан шуғулланмоқчи бўлган юртдошларимизга тавсия қилмайман, чунки ҳикояни ўқиб тамом фанни йиғиштириб қўймасликларингизга кафолатим йўқ ;).

Робиндранат Тҳокур ҳикояларида Қаҳҳор ва Чеховдагидек сиқиқлик, европалик адиблар ҳикояларидагидек яширин юмор йўқ. Манзараларни шошмасдан, бемалол ўтириб олиб, бир чеккадан тасвирлайди. Қаҳрамонлари асосан содда ва диёнатли одамлар. Айрим ҳикоялари кўҳна ҳинд ривоятларига ўхшайди.
Одамлар “прагматик”лашаётган, “тез бой бўлиш” ҳақидаги китоблар оммалашаётган бугунги кунда, билмадим, Тҳокурнинг инсоф-диёнат, очиққўллик, камбағал донишмандлик мавзуларини тасвирланган ҳикояларини ўқишяптими йўқми. Охирги бир сўмини қариндошига инъом қилиб юборган ҳикоя қаҳрамонини ўқиб кулса керак, бугунги китобхон.
Кўпчилигимизда қуйидагича ҳолат бўлган: дунё миқёсида тан олинмаган ёзувчиларимизнинг асарини ўқиб маза қиламиз, аммо Нобел олган фалон зўр ёзувчининг китобини ўқиб ҳеч балони тушунмаймиз, шундай бўлса-да ғофилдек кўринмаслик учун “зўр ёзади” деб мақтаб қўямиз. Тҳокур бундан мустаснодир. Унинг ҳикоялари тушунарли ва содда тилда ёзилган.
Қаҳрамонларининг ҳиндийча узун жимжимадор исмларига чалғишни айтмаганда ҳикоялари жуда қизиқарли ва мароқли. Ўзимизнинг Иқбол Юсуф, Қаҳрамон Аслановнинг маиший мавзудаги ҳикояларига ўхшайди. Бордию Иқбол ака ё Қаҳрамон акалар Тҳокурнинг ҳикояларини ўзлаштириб Гирибалаги Гулнора, Шриматини Шуҳрат деб ўзбекчалаштириб эълон қилса ҳеч ким билмай ҳам қолса керак))

Шунинг учун адабиёт дурдоналарини тушунадиган баркамол китобхондек кўринишни истаганлар Робиндранат Тхокур асарларини ўқиб чиқса, мақсадига етади ;)

22.07.2016

Болалар ижросида мадҳия

Бу видеони ўтган йилнинг охирларида олганман.
Қизимга мактабда, ўғлимга боғчада давлат мадҳиясини ўргатишибди. Алишер 4 ёшга яқин, Камола 6 ёшдан ҳатлаган пайти.
Овоз режиссёри – ўзим. Игор Иосис заҳматини ҳис этдим J
Жонли ижродан баҳраманд бўлинг ;)


30.06.2016

Саккиз фоиз, ўн фоиз…

Метан баллонни алмаштириш керак. Ҳали муддатини адо этмади, аммо капрон баллон бўлгандан кейин портлаши мумкин, ёрилиши мумкин, дебдилар.. Ҳай, давлат бир нарсани билмаса, чиқармас.
Шаҳримизнинг “химик мости” деб айтилувчи чеккасидаги кўприк остида жойлашган автомобилларга газ баллон ўрнатиш марказига бордим. Мақсадни тушунтирдим. Шундай-шундай, саксонталик темир баллон ўрнатилади. Барака топишсин, дарров ҳисоблаб чиқаришди: 1420 минг бўларкан.
-          Менда пластик.
-          Пластикка саккиз фоизимиз бор, ака.
Бу яна устига 113 минг минади, дегани.
-          Жа саккиз фоиз деманг, йўриғли қилиб берсинлар.
-          Иложимиз йўқ.
Тамом. Иложи йўқ, бўлса, йўқ-да. Бошқаси бор-ку. Бошқасига бордик. Чинор тагига яқин жойда “Лада” деб номланувчи автомобилларга хизмат кўрсатиш мажмуасига. Дардимизни айтиш биланоқ, савдо бошланиб кетди. Ҳамма жойда бўлгани каби бу ерда ҳам пластик деб аталмиш, нақд пулнинг ўгай боласига саккиз фоизлик “чегирма” бор экан. Айтганча, бу ерда “мост таги”дан кўра бироз қимматроқ экан. Жиндай савдолашиб, бу ердан ҳам сурдик. Устига бир-икки сўм қўшиб беришимиз маъқул келмади. Ёки айтилган Х суммани тўланг, “пластикли бой”лардан бўлсангиз Х сумма плюс саккиз фоизли бонус.
Эҳ, тирикчилик.
Қоғоз пул ва виртуал пулнинг қоғоздагина тенглиги хусусида мулоҳаза юритиб келаётиб Қўқон дарвоза автошоҳбекатига келиб қолдим. Бу ерда ҳам автомобилларга газ баллон ўрнатишларини реклама қилиб ёзиб қўйишибди, барака топишсин илоҳим.
Телефон қилдим. Майдалашиб ўтирмасдан, ўн фоизли қўшимчасини айтиб қўя қолишди. Мен ҳам майдалашиб ўтирмасдан, жуда оз қўшиб беришимни билдирдим. Ҳа, айтганча, буниси пластикда биру олтига яқинлашиб қоларкан. Умуман олганда “мост таги”дагилар инсоф билан айтибди.
Энди лирик чекиниш қиламиз.
Эшитишимизга қараганда пластик картадаги пул нақд пулга тенг саналарди. Бу гаплар қонун билан мустаҳкамлаб қўйилганини ҳам қаердадир ўқигандик, шу сабабли lex.uz сайтига ҳавола келтириб ўтирмадик.
Минг ва миллион афсуслар, гигабайт ва терабайтлаб надоматлар бўлсинки, пластик картада маош олувчиларга ола-кула қараш давом этмоқда. Албатта, сотувчиларни тушунамиз, хизмат кўрсатувчини ҳам. Пулни банкдан нақдлаштириш қийин.
Ўзимнинг қанчалаб сотувчи дўстларим бор, дардларини эшитганман.
Аммо, ҳеч бўлмаса, Ҳожибой Тожибоевни эслайлик: “Қиммат олган бўлсанг, харидорга нима? У арзон олиши керак”. Ҳа-я, агар қўшимча “бонус” сифатида тўлаётган фоизим сотувчига (хизмат кўрсатувчига) тегмаётган экан, кимга тегяпти? Минг йилликнинг масаласини ҳал қилган қаршилик математик Шокир Давлатовдан сўрайми буни?
Қассобга борсанг, пластик картага серсуягидан солиб берса, магазинда сотувчининг қош-қовоғига қарасанг. Деҳқон бозоридаги олмафурушга терминал қўйса, қуртлиқисидан берармикан...
Айтаверса, гап кўп.
Пластик картадан фойдаланишга ўтганимизга саккиз-ўн йил бўлди. Вазият яхшиланишидан умидворман. Ҳалиям. Мақоланинг пешонасини ярқиратиш учун қонунлар ва Президент фикрларидан, диний матнлардан иқтибос келтириб ўтирмадим. Умуман олганда, мақола эмас бу. Сиз ва биз ҳар куни гувоҳ бўлаётган ҳол.

 2016 йил, 21 апрел

19.05.2015

Бўлай десанг боғбон...

Фарғона шаҳрининг атрофида Чимён, Аввал, Пакана, Хонқиз, Лоғон деган қишлоқлар бор. Атрофи боғ-роғлар, ўрик дейсизми, гилос, шафтоли ғиж-ғиж. Дарахтларни шахмат катагига ўхшаб тартиб билан экишади. Уч ёқдан қарасангиз, текис дарахтлар бир-бирини тўсиб, боғнинг охирини кўрасиз.
Боғларни томоша қилиб кетяпман. Эр-хотин ишлашяпти. Эри мендан каттароқ, шафтолини пакана ўссин деб, тепа шохларини бутаяпти. Хотини кесилган шохларни йиғиб боғлаяпти. Ҳожибой Тожибоев айтганидай, келиннинг қўлига “кетмон берсанг, ернинг жигарини суғуриб олади”ганлардан.
Боғбоннинг айтишича, даромади яхши экан. Гилослар фурада тўғри Россияга.

Бир хонада компьютер ва махсус техникалар билан мунтазам ишлардим. Камҳаракатлик  саломатликнинг этагини ғижимлаб олган.
..Битта ер олсам. 50 сотихми, 1-2 гектарми, қанча бўлса ҳам. Темир контейнерни уйга ўхшатиб жиҳозлаб, оилам билан ўрнашиб олиб боққа қарасам... Ният-да, бу ҳам. Ташкилотнинг ишидан зерикдим. Қолаверса, йиллик даромади йиллик маошдан кўп экан. Табиат қўйнида, дегандай.. Интернет бўлса – бўлди.
Балки боғбон ҳам менга ҳавас қилгандир. Қўли қавармайди, кундузи озода жойда ишлаб, кечқурун уйига боради, деб хаёл қилган бўлса, ажаб эмас.
Лекин мен ҳам ҳавас қилдим. Хуллас, шунақа гаплар. Ёзда келинг, шафтоли еймиз.


22.01.2015

Қиш... Совуқ...

Декабрь. Ҳаммаёқ музлаб ётибди.
Иш юзасидан турли даргоҳларга киришга тўғри келади.. мактаб, шифохона, банк, магазин, ошхона... Яхши иситилаётган бирорта даргоҳни кўрмайсан.
Ишхонада ҳам шу аҳвол. Хоналар музлаган. Электр печка иситиб беролмайди, қўшимча улаш мумкинмас, тармоқ кўтаролмайди. Қуёш булутнинг орқасидан юзини кўрсатса, ходимлар ташқарига чиқиб офтобчувоқда тобланади. Яхшиямки, офтобга ҳеч кимнинг қўли етмайди, бўлмаса уни ҳам сотиб юборармидик.
Ҳожатхона музлаб тошиб кетган. Ичкарида гаплашишяпти.
-          Орқангга зиндалак чиққурлар, оқизиб кетмабди ахлатини
-          Сув музлаган.
-          Уйига опкетсин
-          Уйида ҳам шу аҳвол-да..
Кечқурун эр-хотин бир-бирига термилиб ётаверади. Иккаласи ҳам соғлом, боланинг ухлаши ҳам муаммо эмас. Муаммо – совуқ уйда ювиниш..
Телевизорда, интернет саҳифаларида пляжда яйраб юрган яланғоч одамларнинг, сачраётган сувнинг тиниқ тасвирини кўриб этинг жунжикади.
..Яна ёзардим, компютерим совуқдан қот...

03.11.2014

Йўлда


Довонда кетяпмиз. Ҳамроҳлар Россия, Қозоғистонда ишлаб қайтаётган болалар. Гаплашиб кетилади бунақа вақтда.
Дунёқарашлари – ноль. Биттаси “ўрисларнинг фамилияси ҳам биздақа экан, нима биздан кетганми?”- деб сўради. “Нимаси биздақа?”- десам, палончиев, пистончиев дейди. Яна бири “Тошкент Фарғона водийсининг ичидами?” – деб сўради. Биттаси бўлса “дадаларимиз Россия, Германияда хизмат қилган, бизам борсак оладими?” – дейди.
Кейин, биласизми, ҳар хил шароитда ётиб юрган одамнинг қандайдир нохуш ҳиди бўлади. Терми-ей, хуллас, алланиманинг ёқимсиз иси. Аранг чидаб кетяпман. Машинанинг деразасини очдик.
Ҳайдовчи плейерга диск қўйди.
Хасис дунё,
                  бевафо дунё,
Бир гўзални кўрмадинг раво
Мен дунёга эрта келдим ё
Севгим менинг, кечиккан севгим…
Нима ғамдир, нимади-ир қувонч…….
Ҳамшаҳарини мақтаяпти, демангу, ҳақиқатдан зўр куйланган қўшиқ. Қарасам, ёнимдаги гастарбайтерлар ҳам куй ёққанидан жим бир нуқтага термилиб нафас ютганча эшитиб кетишяпти.
Манзилга етиб бир-бир тушиб қолдик.
Шу жойигача ўқиганингиз учун ҳам раҳмат. Нимага ёздим ўзи буни? Билмасам…

17.01.2014

Энг машҳур ёлғонлар

Бу энг машҳур ёлғонларни одноклассникида бир статусда ўқиб қолдим

– O‘tirsangiz, osh pishayotgan edi.
– O‘rtoq komandir, men yashilda o‘tdim.
– Hozir millionlab tomashabinlar bizni tomosha qilishmoqda.
– Bu oxirgi sigaretam
– Ayollarning xunugi bo‘lmaydi.
– Eshik tagida 2 soat kutib turdim, hech kim ochmadi.
– Seni o‘ylab, tuni bilan uxlay olmadim. 
– Sen meni yoshlik paytimda ko‘rganingda edi… 
– Seni laylaklar olib kelgan. 
– Bu men olgan hadyalarning eng yaxshisi. 
– Hamma bir kishi uchun, bir kishi hamma uchun. 
– Men yeya olmayman, doktor taqiqlagan. 
– Ishimni bitirgach, o‘zim qo‘ng‘iroq qilaman. 
– Oxirgisini sizga sotyapman, bundan boshqa qolmadi. 
– Men ham senga endi telefon qilmoqchi bo‘lib turgan edim. 
– Bizni taklif qilishdi, lekin biz bormadik. 
– Sovqotayotgan bo‘lsang, kostumimni kiyib tura qol. 
– Ayollarga kal erkaklar yoqadi. 
– Orqasidan gapirma-yapman, shu yerda bo‘l-sa, yuziga ham aytardim. 
– Gol urish yoqadi, lekin assistentlikdan ko‘proq zavq olaman. 
– Uyimizda elektr toki uzilib qolgani sababli uy vazifamni bajara olmadim. 
– Men shunday bo‘lishini bilar edim. 
– Men uchun eng muhimi qalb go‘zalligi, yuz go‘zalligi emas. 
– Xuddi siz uchun tayyorlanganday. Sizga juda ham yarashdi. 
– Buni menga ham sovg‘a qilishgan, bo‘lmasa sizga jon deb berib yuborar edim. 
– Xo`jayin majlisda edilar. Kim so‘radi deb qo‘yay? 
– Men hech yolg‘on gapirmayman.

Шундан кейин давом эттириш истаги пайдо бўлди ва ҳамкасбларим билан кўз очиб юмгунча янгиларидан қўшишга муваффақ бўлдик. Камига эса фейсбукдаги ошналар “қарашиб”  юборишди. Шунда блогимнинг ўқувчиларига ҳавола этиш истаги пайдо бўлди. Албатта уларнинг ҳаммасини ҳам бу ерда ёзиб бўлмайди, қуйида фильтрдан ўтганларини келтираман. Ўқинг ва кулинг ўртоқлар. Қўшимча қилмоқчи бўлсангиз бемалол

  • Телефон килдим, тушиб бўлмади
  • Амаким прокуратурада ишлайди
  • Э, бу мен ёшликда роса юрган қизу...
  • Армияда командирнинг шопири (ё ошпаз) бўлганман
  • Энг арзон маҳсулотлар бизнинг супермаркетда  сотилади
  • Бу фильмимиз олдингиларидан катта фарқ қилади
  • Сизга ўз нархида бераман
  • Яхши ўқи болам, мен ҳам мактабда аълочи эдим.
  • Районимиз (вилоятимиз) доим биринчилардан
  • Агар мени сайласангизлар..
  • Бу таомни тайёрлаш учун кўп масаллиқ шарт эмас
  • Ёшликда меҳнатни роса қилиб кўйиб бўлганман
  • Юсел ва билайндан овоз:  Абонент хизмат доирасидан ташкарида
  • Ваш компютер под угрозой
  • Душанбадан бошлайман
  • Бу тартибсизликка бугундан бошлаб чек қўйилади
  • Кичкиналигимда эскича ўқиганман, тақводор бола эдим.
  • Келаси ҳафта ойлигингиз чиқади (ё тушади)
  • Пластикка савдо қиламизу, терминалимизни банкка олиб кетишган
  • Бир майизни қирқ киши еган
  • Мажлис чўзилиб кетди, аяси..
  • Бир кун ишлаб беринг, бир кун минг кун эмаску!
  • Энди, қизимиздан, гапирсак, қўлидан келмайдиган иш йўқ, чевар, пазандалигини айтмайсизми. Шу пардаларни ҳам ўзи тиккан..
  • Ўғлимиз ҳам ўқимишли, ақлли, топармон-тутармон йигитлардан
  • ...иштирок этинг ва айфон ютиб олинг...
  • Юк кўтарган юзага чиқади. Ишни қилаверинг, нексия оласиз..
  • Имтиҳондан ўтдиму, контракт бўлди, шу сабаб ўқимадим