30.11.2019

Класс ва кечикиш


“Америка уч юз йилда шу мақомга етган бўлса, Ўзбекистонимизни ўттиз йилда шу даражага етказган Ислом Каримов бобомизнинг руҳлари шод бўлсин. Ислом бобомизнинг ҳақиқий издошлари Шавкат Мирзиёевнинг умрлари узоқ бўлсин”, деган постга класс қўйган онимдаёқ электр лип этиб ўчди. Электр ва телефон антеннаси бирга йўқолади. Демак, класс босилди ёки босилмади.
Беш дақиқа ўтиб ёнимдаги ўғлим ғингшиди:
-  Дада, совқотдим
-  Ҳозир иситамиз-да, тойчоғим!
Дарров печкага тезак, баклажка, тут томири, маккасўта, ёнғоқ пўчоғи, картонқоғоз, кир латта ва улардан тушган супуриндини қалаб устидан кўмир босвордим. Хаёлим интернетда. Кўмирдан қорайган қўлда телефон тутиб бўлмайди. Эшикдан чақиришди.
-  Маҳалла йиғиляпти. Свет-газ, боғча, медпункт, йўл қуриш, обод маҳалла масаласи кўрилади.
-  Мингинчи мартами? Ҳозир чиқаман.
Югуриб анҳордан сув келтириб, ювингач, мажлисга чиқдим. Колхоз зали бузиб ташлагани учун мактабга тиқилдик. Катта хона ташқаридан ҳам совуқлиги учун интернетга киришга қўлим қовушмай қайтдим. Афсус. Ия, укам қайтибди.
-  Рейд кўпайиб кетди. Буёғи байрам, прописка чатоқ. Объектни тугатмай қайтдим.
-  Яхши қилибсан, ука. Ғиштингни шу ердаям кун илиса қуяверасан. Молингни боқ.
Интернет ишламаса, саҳифа ёниқ туради, аммо класс қўйсанг, бир ондаёқ асл ҳолига қайтиб қолаверади. Менда ҳам шундай бўлдимикан? Яна эшикдан чақирди.
-  Қўл қўйинг. Томорқани экмасангиз, жаримадан огоҳлантирамиз.
-  Хўп, хўп-да. Қайси идорадансизлар?
Музлаб улгурмаган ерни чопиб қўйиш мумкин. Жаримадан яхши-ку. Интернет кутиб туради. Ташқаридаги тириллаган булдозерми? Уйим “снос”га тушдимикан? Дарҳол кўча деворимга “Бу уйда одам яшайди” ёзувини илдим.
 Ниҳоят электр помидор каби ёнди. Телефон антеннаси липиллади. Кечиккан класс босилди. “Америка уч юз йилда шу мақомга етган бўлса, биз ўттиз йилда шу даражага етдик. Умрлари узоқ бўлсин”. Худога шукр. Эшикдан чақирманг. Менинг бошқа идорада ишим йўқ. Кеч бўлди. Ухланг. Ҳикоям тамом.
2019 йилнинг 10 ноябри

24.12.2018

Тарвузнинг зарари ҳақида


Тарвуз мазали ва фойдали полизмева. Танани роҳатлантиради, оч қолганда есангиз тўйдиради, овқатдан кейин есангиз, ҳузур қиласиз. Қолаверса, танани зарарли моддалардан тозалаш хусусияти бор, ҳар хил касалликларга даво. Тарвуз исли атирлар қиммат туради.
Тасаввур қилинг: тарвузни суймайдиган бир кишига амал тегди ва у ишни тарвузни тақиқлашдан бошлади. Ишонаверинг, бунақаси юз бериши мумкин. Тарихда француз қироли Генрих Тўртинчи қовунни судга берган. Ўзимизнинг ёзувчи Саид Аҳмаднинг “Ўрик домла” деб аталувчи машҳур ҳикояси шўро даврида Ўзбекистоннинг “ўрик” лақабли ҳоким бошқарувчи вилоятида чоп этилмаган. Чунки ўрик репрессияда бўлган-да.
Тарвузимизга қайтайлик. Шундай қилиб, энг аввало турли-туман газета-журналлар тарвузнинг зарари ҳақида олимларнинг илмий мақолаларини чоп эта бошлайди. Илмий-оммабоп мақолалар қуйидагича бошланади “Тарвуз мазали, бироқ...”, “Дастурхонимиздаги душман..”, “Ҳамма ширин нарса ҳам фойдали бўлмас”, “Лаззат оғушидаги оғу”.
Бу ҳолваси, телевидение тарвузни қораловчи кўрсатувларга тўлади. Қора фонда, ўргимчак тўри тасвири устида оқаётган қондай ҳарфлар билан “Тарвузга банди бўлганлар”, “Нафс сиртмоғида” номли кўрсатувлар намойиш этилади. Видеороликлар олинади. “Мен Эшонов Боҳодир Каппонбозордан тарвуз олгандим, ичи селитрага тўла чиқди. Сўйсам ичидан шарват эмас, селитра оқиб кетди. Тарвуздан кечинг, Дубайга учинг”. Овози киши қалбига ғулғула соладиган диктор амаки узуқ-юлуқ қорамтир кадрлар аро ҳикоя қилади: “Мен Қозоғистонга бир КамАЗ тарвуз олиб боргандим, у ерда мени Марат исмли кимса кутиб олди. Тарвузларим ачиб-бижиб ўзидан заҳарли газ чиқара бошлади. Ҳозирда биринчи гуруҳ ногирониман”
Имом-домлалар жамоатга кенг тарғибот ишларини олиб боришга киришади. “Биродарлар! Аҳли жамоат! Шу таги-зоти бетайин одамнинг бошини эслатадиган думалоқ экинни тановул қилишимиз жоизми? Шу керакми бизга, айтинглар. Айрим бетавфиқлар ичини тешиб, спирт аралаштириб самогон, деб аталган ҳаром ичимлик тайёрлашяпти, ахир. Шайтоннинг сийдигику бу, валлоҳи аълам. Ўзларингни ҳалокатга ташламанглар, аҳли жамоа. Харид қилиш ҳаром, харид қилган билан мулоқот қилиш макруҳ!”.
Шу зайлда жамият тарвуз асли ширин қотиллиги ҳақида маълумотга тўяди. Натижада, бирор издиҳомда тарвуздан гап кетса, зиёлилар “...шунақа дейсизлару, аммо бу тарвузнинг фойдасидан зиёни кўп...” деб гап бошлайдиган бўлади. Тарвуз радди маъракага айланади.
Хўш, турган-битгани зарар бўлган бу нарсани ёш болага бериб, навқирон умрига болта уришга не ҳожат. Тезда болаларни тарвуздан асраш борасида чора-тадбирлар ишлаб чиқиш зарур. Нафақат, тарвуз, балки қовун, ошқовоқ каби ортиқча полизмеваларни болалар дастурхонига яқинлаштирмаслик керак. Негаки, улар тарвузни эслатади. Қовун-тарвуз, деб бежизга қўшиб айтилмайди, ахир. “Болаларни тарвуздан асрашнинг чора-тадбирлари тўғрисида”ги янги қарорда 16 ёшга етмаган болага тарвуз бериш, унинг яшаш ҳуқуқига дахл қилиш эканлиги белгилаб қўйилди.
Фалон маҳаллада қиёмат қўпибди. Э,воҳ, нима бўлибди? Сўраманг, асти, кеча Россияда ишлаб келган фалончивой ёш-ялангларни тўплаб тарвуз сўйиб бераётганда қўлга тушибди. Сўмкасида иккита яшириб олиб келган экан. Ўзингиз биласиз, Краснодар тарвузлари жа бошқача бўлади. Ширасини оқизиб еб ўтиришганда шаппа босишибди. Ҳадемай телевизорда кўрсатиб қолишади. Тарвуз, ахир полонийдан баттар зиён нарса бўлса, чегарада ушлаб қолса ўлармикан. Эссиз, ёш-ёш йигитлар...
Тарвузнинг номини ҳам барча жойдан ўчириш керак. Китоблардан оқ бўёқ билан “тарвуз” ёзуви ўчириб чиқилсин. Биология фанида, кулинарияда тарвуз мавзуи қолдириб ўтилсин. Маъно бузилиш эҳтимоли вужудга келса, “кўк думалоқ” деб аталсин. Нефть кони билан адаштиришади? Коннинг номини ўзгартирамиз, шуям ишми? Тамом, адабиётлардан ҳам тарвузнинг қораси ўчди.
Кечагина пайкал бошида тарвузни  ёриб еб юрган одам дунёни бир айланиб келиши биланоқ бу ҳолни кўриб ҳуши бошидан учди. Ия, бу қанақаси бўлди? Ҳушини йиғиб олмасиданоқ, тарвузранг формали иккитаси тирсагидан тутди: - Ҳужжатларни кўриб қўяйлик. – Марҳамат. - Оғзингиздан тарвуз ҳиди келяпти-ку. Биз билан маҳкамага юришингизга тўғри келади. Тарвуз тақиқланганини билсангиз керак. – Кечирасиз, тарвуз еганим йўқ, тарвуз исли атир сепганман. – Экспертиза аниқлайди. – Қандай қилиб? – Қонингиздан аниқлайди. Шунингдек, ошқозон микрофлорасидан. Ахлат ва сийдигингизни топширасиз. – Мен, ахир тарвуз емаганман. – Тез юринг, гапни кўпайтирмай. Бир соат кечиксак, тарвузнинг асосий таркиби глюкоза қонга сўрилиб кетиши мумкин, унда таҳлилчиларимиз қийналиб қолишади.
Кетишди. Биз ҳам ҳикоямизни шу ерда тугатиб ўз йўлимизга кетамиз. Давомини сўраяпсизми? То дориломон замонлар етиб келгунча авлодлар тарвуз нималигини билмай ўсади. Биласизми, шунга қарамасдан тарвуз мазали ва фойдали неъматлигича қолади. Ким билади, дейсиз, эҳтимол, яширинча еб, уруғини сақлаб қўйишар.
 2018 йил, декабр

31.03.2018

Қайнонамнинг совғаси (Дима Қаюмга бағишлов)


Зап қайнонам бор-да. Куёвини ҳамма жойда паддержка қилиб юради. Туғилган кунимда хотин онасиникига борибди, қаранг. “Куёвизга нима совға қиласиз” аяжон деб сўраса, бир пачка долларни кўрсатган экан (бой бойда барибир), хотин “фу, ҳозир қуруғини узатиш модадан қолган, қуруқ долларга пишагам офтобга чиқмайди”, деворибди. “Ҳа, бўмаса, Гавайи оролларигами, Анталиягами путёвка оберай, бола-чақани манга қолдириб куёвим билан дам олиб келинглар” деса, “ўзи кеча Исландиядан келдик, уёққаям куёвиз печка экспорт қилмоқчи, совуқ жойларакан, ҳам саёҳат ҳам тижорат дегандай дам олиб келдик, энди саёҳатга чиқмаймиз” дебди. Ҳа, содда хотин-а, Исландияга нимага борганимни билмайсанда, фуқаролигини олмоқчи бўп борганимни билдирмайманда (тшш, жим туринг, шовқинламанг). Хуллас десангиз, охири қайнонам туғилган кунимга антиқа сюрприз қиладиган бўлди. Нима дейсизми? Ўзимам телвизордан билдим. Икки ой бурун газчиларни каттаси телвизорда чиқиб “халойиқ, бу йил газ бўмайди, умид қилманг”, деганда хурсанд бўлганимдан ўзимни томдан ташлаворай дедим. Аслида унинг гапини давоми “...газ бўмайди, ўтин печкага ўтинглар, Дима Сахий печкаларидан харид қилинг” дейиши керак эди. (Ҳаммаси қайнонамнинг плани бўйича кетяпти). Ғирром операторлар шу жойини кесиб ташлапти. Ҳа, майли, асосийси мақсад айтилди-ку. Қайнонам Адолат Усмоновани танимайдиган одам бор эканми? Бой бойда барибир. Шундай қилиб биз тузган молиявий схема бўйича одамларга печкани саккиз баробар кўп сотиш мўлжалланяпти.
Ҳа, бунинг учун катта харажат қилди қайнонам. Кетса бойдан кетибдида. Олдин радио, телвизор, газета, сайтларда махфий заказ бериб печканинг афзаллигини тарғиб қилдик. Баҳриддин Асрор, Шукур Исломов, Дониёр Рўзметов, Ривожиддин Абдумаликов деган ёзувчилар таппининг фойдаси, ўтиннинг чўғи, газнинг зиёни ҳақида қоп-қоп мақолалар ёзиб тарқатди. (Ҳаммаси қайнонамнинг плани бўйича). Ҳозир битта олим таппининг соф зичлиги, концентрациясини ўрганяпти, бошқаси калориясини ошириш, ҳидини кетказиш бўйича диссертация ёқлаяпти. Ҳаммасини ҳомийси Адолат Усмонова. Бой бойда барибир.
Ҳаҳайт, давринг келди суриб қол Дима. Дима Сахий печкаларига кепқолинг, деб Равшан Эрматовнинг рекламада чиқишини ўхшатиб турсам, хотин “туринг, дадаси, одам деган печканинг устидаям ухлайдими, тагиздан совуқ ўтиб кетса менга қийин”, деб уйғотди. Кўзим кетиб қопти.
2017 йилнинг декабри

28.02.2018

Ўзбек жамиятидаги муаммоларга ким айбдор?

(Қодирийдан илҳомланиб)

Секулярнинг наздида экстремистлар айбдор.
Атеистнинг наздида динчилар айбдор.
Мусулмонларнинг наздида кофирлар айбдор.
Неокоммунистларнинг наздида Америка ва Европа айбдор.
Ярим асрдан кўп яшаганларнинг наздида “мустақиллик даврида бой берилган авлод” айбдор.
Ёшларнинг наздида “давлат тизимида сақланиб қолган ёвуз империя сарқитлари” айбдор.
Пантуркист-миллиётчиларнинг наздида Россия, Хитой ва арман мафияси айбдор.
Либералларнинг наздида “тоқатсиз қадимчи-динчи тоифа” айбдор.
Бўтқа дини вакилларининг наздида ташқаридаги барча мусулмонлар ва кофирлар айбдор.
Миллий истиқлол ғояси билан суғорилганларнинг наздида “четдаги ёвуз ва қора кучлар” айбдор.
Расмий ахборот агентликларининг наздида ВВС ва Озодлик айбдор.
Консерваторларнинг наздида либераллар айбдор.
Ултраконсерваторларнинг наздида гей-фоҳишалар айбдор.
Исёнкорларнинг наздида лоқайд ва бетараф оломон айбдор.
Маддоҳларнинг наздида “одобсиз” исёнкорлар айбдор.
Аҳён-аҳёнда интернетга кирадиганларнинг наздида “кечаю кундуз интернетда ғийбатлашиб ўтирадиган бекорхўжалар” айбдор.
Туну кун интернетда ўтирадиганларнинг наздида “эркин ахборот манбаидан четда қолаётган” ғофиллар айбдор.
“Ҳожи ака”ларнинг наздида “калта-култа кийиниб фитнага сабаб бўлаётган” ёш-ёш қизлар айбдор.
Кам таъминланган қатламнинг наздида патрул мелиса ва президентнинг атрофида амалдорлар айбдор.
Пули ва лавозими бор қатламнинг наздида “ўз ҳақ-ҳуқуқини билмайдиган люмпен халқ айбдор”.
Тадбиркорларнинг наздида солиқчи ва молиячилар айбдор.
Конформистларнинг наздида давлат ва президентни танқид қилаётганлар айбдор.
Гринкардда ютолмаганларнинг наздида Қўшма Штатлар айбдор.
Гринкардда ютиб учиб кетаётганларнинг наздида аэропортнинг серташвиш ходимлари айбдор. Аммо уларни айблаш керак эмас. Шундоғам ташвиши кўп. Ҳамма кетса, чироқни ким ўчириб қўяди улардан бошқа?
2018 йилнинг 26 феврали

30.09.2017

Қирқ ёшлилар (18+)

(аёллар ҳам ўқимасин)

Ўртоқлар, охирги йилларда ўтириб қолиш ҳаёт тарзи (сидячий образ жизни) турмушимизга сингяпти. Йўқ, ўтириб қолган қизларни эмас, эркакларни назарда тутяпман. Эрталаб югурувчилар сони камайиб кетяпти. Тушунинг, сиз эрталаб югурар экансиз танангизда, хусусан, белингизда қон яхши айланади, саҳарлаб уйғонган кучуклардан эмас, касалликдан қочасиз.
...Вазият тақозоси билан қирқ ёшли акаларнинг даврасига тушиб қолдим. Гапдан гап чиқиб соқолига оқ оралаган бирови:
-          Бозорнинг четида балиқ тутадиган қармоқ олаётганимда бошяланг бир аёл ёнимга келиб, “акажон, дорилардан бор, оласизми?” деб шивирлади. “Дори чекмайман”, десам, “вой, унақа доримас” деб кулади. Ҳар хили бор экан – ўзи тўртбурчак, шакли шилпилдоққа ўхшаган, кўк, жигарранг, носранг, ялтироқ, пилдироқ..
Ҳамма унга бақрайиб қаради.
-          Олдингми?
-          Э, жиннимисан?..
-          Олганса-а-ан.
Яна бири:
- Отиям нима-гра эди, шекилли, биров айтовди-да, - деб минғирлаганча кўзини пирпиратди.
Гапни бошқаси илиб кетди:
-          Ичиб кўрганларни айтишича, бошни қизитаркан. Фойдаси йўқ, табиийсига нима етсин.
Унга билимдонлик билан бошқаси эътироз билдирди:
-          Қизитмайди, арзонига учмасин, танишингга айтиб қўй.
-          Сен қаердан биласан, ичиб кўрганмисан?
-          Ичмасам, ҳам биламан. Россияда ишлаганимда ўрис ўртоқларим ҳаммаси ичарди. Сал тахир бўлар экан. Уларнинг мотори стук бергани учун ҳаммаси бизга ҳавас қилади. Азиат – горячая кров!
Улфатларнинг кўзойнак таққани сиполик билан гапга аралашди:
-          Турган-битгани зиён, химикат. Юракка нагрузка беради. Бош оғрийди. Ўрганиб қолсанг, хотининггаям, ўзинггаям қийин бўлади. Ота-боболаримиз от минган, отнинг фойдаси катта. Бўш қолдингми – от мин. Вот, табиий восита сенга.
-          Хи-хи-хи, эшак ҳам минган, - деб луқма ташладилар унга.
Кўзойнакли сабоқ беришда давом этди.
-          Аммо ҳозирги дўхтирлар экологик шароитдан келиб чиқиб, қирқ беш ёшга етганингда аёлинг билан орангда муаммолар юзага келса, ичавер деяпти. Аммо буни ўз шартлари бор. Бирваракайига биттадан ортиқ таблетка ичмайсан. Номининг охири “–гра” билан тугаган бўлиши шарт. Масалан, “Циклон” дориси зиён. Падделкаларидан эҳтиёт бўласан. Кечаси билан бўкиб ароқ ичдинг нима, циклон ичдинг нима – эрталаб бошинг ғум-ғум оғрийди. Машина ҳайдашни-ку ўйлаб ўтирма.
Ҳамма “Минг бир кеча”дан қисса тинглаётгандек кўзини лўқ қилиб, нафас чиқармай уни тингларди. Серсавол улфатларнинг бири:
-          Орифжон, орамизда ўқиганларимиздан бирисан. Элликка кирганимизда ичсак бўлаверадими?- деб сўради.
-          Бўлади. Проблеманг бўлса, ҳозир ҳам ичавер.
-          Олдин сен ичиб кўрсатиб бер.
-          Мен соғломман. Проблемам йўқ, ичишга эҳтиёжим ҳам йўқ. Дорихонадан сўрагани ҳам уяламан. Сотувчи аёллар орқангдан мийиғида кулиб қўяди, биласанми шуни?-деди аччиқланиб.
-          Бўлмаса, қандай қилиб олса бўлади, маслаҳат бер, ахир.
-          Ўртоғимга керак, деб оласан. Дорихонада ўзингни бошқа дори олиш учун киргандек тутасан, чиқиб кетаётганда, худди тўсатдан кўзинг тушиб қолгандек, “ие, манови дорини битта оғайним сўраган эди”, деб оласан-қўясан.
-          Ҳа, сен буни қаердан биласан?
-          Газетада ўқиганман, ўрисча, инглизчани биламан-ку.
-          Кейинчи, кейин, уйга борганингда?
-          Ярим соат олдин сув билан ичиб олиб, кейин...
Суҳбат энг қизиқ жойига етганда кеч қолган биттаси кириб келди. “Қўзғалманглар, кўришганимиз - сўрашганимиз”, деганча жойига ўтираркан, суҳбатни давом эттиришга ишора қилди. У андролог экан. Бирпас эшитиб ўтириб, сўнг гапга аралашди:
-          Мижозларимдан бири қабулимга кириб, эшикни зичлаб ёпди. Овозини пасайтириб уялганча, “Дўхтир, бир дўстимни...”, деб гап бошлаганди, гапини кесиб, “қани, шимингизни туширинг, олдин дўстингизни текширайлик”, дедим.
Шунда ҳамма бирданига гуриллаб кулиб юборди. Айниқса, “дори” мавзуида қизғин суҳбат қурганлар ерга қараб ҳийқ-ҳийқ, дея мириқиб кулди.
Буёғини энди ўзингиз тушундингиз. Айтгандим-ку.

2017 йилнинг июл ойи

25.08.2017

Файзбоғда тайёргарлик

Президент депутатларга ижтимоий тармоқларда ўз саҳифаларини очишни буюрди
(янгиликлардан)
Эрта-индин 150та депутат файзбоғимизга кириб келиши керак. Ҳаммамиз бунга шай туриб кутиб олайлик. Ҳаммаёқ тартибли, ораста бўлсин :D
Ҳамма деворини (стенасини) кўк, қизил, зарғалдоқ рангларга бўясин, яшилга бўяманглар. Файзбоғ ҳам ўзимизнинг уйимиз, узуккун 24 соат шу ердамиз. Ўз уйимизни ўзимиз ораста тутмасак, биздан бошқа ким ҳам масъул. Девор бўяш қўлидан келмайдиган катталар ёшлардан илтимос қилинг.
Депутатларнинг олдида бамаъни, сипо одам бўлайлик. Диндор-атеист/секуляр, россияпараст-америкапараст гуруҳларга бўлиниб урушиб ўзимизни кўрсатмайлик. Муаммолар ҳақида сўраб қолишса, “Ҳаммаси яхши, муаммомиз йўқ” деб айтинглар. Анови камолотчи, йўғе, “Ёшлар иттифоқи”чи қизимиз шаҳримизга кутубхона қуриб беринг деган илтимоси ерда қолмасин, депутатларга айтса, майли. Эслатма: “Ёшлар иттифоқи”ни қисқартириб ёш.ит. деб ёзиш йўқ. Бу ҳурматсизлик бўлади.
Ўйламай-нетмай коммент ташлаб ҳамманинг асабига тегадиган болалар файзбоққа кирмай турсин. Депутатларнинг олдида аднўча ёзманглар, уят бўлади. Файзбоққа бир оз ўрганиб олишсин, кейин ёзаверасизлар.
Гуруҳлардаги ҳар хил бекорчи гаплар, расмлардан тозалаш керак. Тозалаш ишларига файзбоғнинг дўхтирлари ва шифокорларини жалб этинглар.
Саф тортинг, жиддий бўлинг, ишорат қилганимизда қарсак чалинг. Улар вақтинчага келяпти, эрта-индин ваъдаларни эсдан чиқариб қайтиб кетишади. Виртуал бекорчилар сафида нима бор уларга?

Аммо файзбоғ уларга ёқиб, қолиб кетишса, нима бўлади? Мана муаммо қаерда.
2017 йил 16 июль

27.05.2017

Ўзбек ОАВнинг учқур иборалари

  • Юртимизнинг қай бир гўшасига борманг..
  • ..жаҳон ареналарида баралла янграмоқда
  • ..янада юксакларга..
  • Ўзимга берилган фурсатдан фойдаланиб..
  • Мамлакатимизда рўй бераётган демократик ислоҳотлар натижасида..
  • Мустақиллик шарофати билан..
  • Биз ёшларга берилаётган имкониятлардан фойдаланиб...
  • Корхона ишчиларининг асосий қисми коллеж битирувчиларидир.
  • Президентимиз раҳнамолиги остида..
  • ..барча шароитлар мужассам
  • ..алоҳида эътибор..
  • ..маънавий-маърифий тадбирлар ўтказилмоқда.
  • ..устувор йўналишларидан экани алоҳида таъкидланди.
  • ..ҳар томонлама қўллаб-қувватланиши..
  • ..байрамона кайфият бағишлади.
  • ..бир тану бир жон бўлиб..
  • ...байрам шукуҳи кезиб юрибди.
  • ...изчил ислоҳотларни янада такомиллаштириш мақсадида изланишлар олиб борилмоқда.
  • Жаҳон молиявий инқирози юз бераётган бир даврда биз олиб бораётган ислоҳотларнинг натижаси ўлароқ бутун дунё бизга ҳавас билан боқмоқда
  • ..чуқур англаган ҳолда..
  • ..янада такомиллаштириш..
  • ...буюк давлатлар билан..
  • ..ёвуз кучлар; қора кучлар; тинчлигимизни кўролмайдиганлар..
  • ..ҳар бир юртдошимиз қалбида..
  • ..маънавий таҳдидлар; оммавий маданият хуружи; манқурт ва манфур кимсаларнинг кирдикорлари; мустақиллигимизни кўра олмайдиган ватангадолар; сўқирлар, тубанлар..
  • ..илмий-маърифий анжуман бўлиб ўтди.
  • ...жаҳонга юз тутмокда.
  • Ёшларимизнинг ҳеч кимдан кам эмаслигини ва ҳеч кимдан кам бўлмаслигини...
  • ..фусункор гўшалар..
  • Ривожланишни янада чуқурлаштириб, такомиллаштирувчи бир қатор изчил чора-тадбирлар амалга оширилмоқда..
  • ..жаҳон молиявий-иқтисодий инқирози шароити глобал миқёсда давом этаётганига қарамай, иқтисодиётимизни диверсификациялаш..
  • ..имтиёзли кредитлар эвазига..
  • ..мусаффо осмонимиз остида..
  • ..эндиликда мазкур технология сабаб жаҳон бозорида рақобатбардош бўлган, сифатли маҳсулот ишлаб чиқарила бошлади
  • ..энг олис-олис қишлоқларда ҳам..
  • ..замонавий спорт иншоотлари..
  • ..жойларда тарғибот-ташвиқот ишлари олиб бориляпти.
  • ..спортга бўлган эътибор..
  • ..виртуал ўргимчак тўри..
  • ..об-ҳаво инжиқликларини мардона енгиб ўтиб..
  • ..ҳар жабҳада ислоҳотларнинг самараси яққол намоён бўлмоқда
  • истиқлолимизни кўра олмайдиган паст ва ғараз ниятли қора кучлар ахборот хуружи орқали ёшларимизнинг онгини заҳарлашга уринишмокда.
  • Режани ортиғи билан бажариб, юртимиз равнақига ўзларининг камтарин ҳиссаларини қўшмоқдалар
  • ..турли жаҳон рейтингларида юқори ўринларни эгалладик.
  • ..бизга шунчалик шароит яратиб берган..
  • ..иқтисодий ислоҳотларни янада чуқурлаштириб, ҳаётга изчил татбиқ этишимиз керак.
  • ..ҳозир дунёдаги глобаллашув жараёнида..
  • ..об-ҳаво шароитининг инжиқ келганлиги туфайли..
  • ..мўмай даромад орттириш илинжида..
 ОАВ эгатлари узра теримчи Ш. Исломов

06.09.2016

Тайёрмизми?

(насиҳатгўй воизлар услубида)
Мана июл ойи ҳам поёнига етмоқда. Умримизнинг азиз дақиқаларини елга совурмаяпмизми, биродарлар?
Эртага қиличини қайраб қиш келади. Машаққатларга тайёрмизми? Оғир дамлар етиб келишлигининг тадоригини кўряпмизми? Қанча кўмир ғамладик, нечта тезак-таппи ясадик? Жавоб бера оламизми?
Дориломон кунларда биздан қоладигани шу, биродарлар! Чойхонада пиво ичишлигимиз, ариқнинг бўйида қовун сўйиб ейишлигимиз ўткинчи. Фақат ғамлаган ўтинимиз билан мақтана оламиз. Нима қилдик шу бугунгача? Кўмир олдикми? Ғўзапоя-чи? Ҳа, балли. Қишга шуни кўтариб боришлигимизни ёдда тутайлик, биродарлар.
Газга ишонманг, аҳли жамоа. У бугун бор – эртага йўқ. Токни кўряпсизми? Кўряпмиз, дейсанми, Маъруфхўжа? Қаердан кўрасан, кўзга кўринмаса, ранги, ҳиди бўлмаса? Пайпаслаб кўрдингми? Ёлғон гапирмайлик, азизлар. Ёлғончи каззоб Андижон печкасига ўтин бўлишлиги лозим.
Биродарлар, ортимиздан нима қолади? Бале, фарзандларимиз! Шу шакардек азиз фарзандимиз қишда совуқ уйда ётиб бетоб бўлса, алал-оқибат пневмония, зотилжам каби турли-туман касалликларга чалинса, “отажон-онажон, менинг аҳволим оғир”, дея нидо қилса, ким айбдор, биродарлар? Биз, албатта! Биз бўлмасдан, ким бўларди. Қаҳратонда шифохоналаримизда жой етишмаса, ташкилотлар, хоссатан, мактаблар, иситилмаса, ким айбдор? Бунга ҳам биз айбдормиз, биродарлар. Болани касал қилишлик ножоиздир. Бунинг учун биздан, албатта, сўрашади. Шу сизга-бизга хос амалми, айтчи ўзинг, Маъруфхўжа?
Биродарлар, жамоат мендан яна бир маҳрам гапни сиз азизларга етказиб қўйишлигимни илтимос қилишди. Ўтган йили Имомали фермер ҳожининг пилла қуртига сақлаган тутлари кесиб кетилаётганлиги хусусида шикоятлар эшитдик. Бировнинг тасарруфидаги дарахтни куппа-кундузи кесиб олишлик бизга ярашадими, биродарлар? Кесадиган одам, бировга сездирмай, махфий иш тутса бошқа гап экан.
Ҳа, тут ўтин, қолаверса, ўрик ўтин яхши ёнишлиги бор гап. Кесинг, ёринг, чопинг, манфаатланинг, аммо-лекин исроф қилманг, биродарлар. Биздан болаларимизга нима қолади? Тут қолади, ўрик қолади. Шунинг учун ўрик экишликни, тут экишликни канда қилмайлик, биродарлар. Токи орқамизда қолган фарзандларимиз бизни дуоларида эсласин.
 P.S. Блогпостда воизлар нутқини кулгига олиш эмас, кундалик муаммоларни бошқача услубда қаламга олиш назарда тутилган. Ҳеч қандай воиз нутқида бундай парадоксал гапларни айтиши мумкин эмас, шунинг учун барча ўхшашликлар тасодифийдир. 
2016 йилнинг 31 июли

31.08.2016

Хонтахта сиёсатшунослари

Интернет, цивилизация, механизация, вулканизациянинг ривожланиши билан янгидан янги касб-ҳунарлар ва ижтимоий тоифалару гуруҳлар шаклланди. Диван сиёсатчилари ёки хонтахта сиёсатшунослари шулардан бири.
Уларнинг тури кўп. Ижтимоий тармоқларда кундан кунга урчиб бормоқда. Бири Америка томонини, иккинчиси Россия томонини олиб бир-бирининг гўрига тинимсиз ғишт қалаб туришади.
Агар сиз ҳамиша бир томоннинг ёнини олиб, иккинчи томоннинг гўрига донаси 310 сўмли пишиқ ғишт қаламаган бўлсангиз, демак улар тоифасига кирмайсиз ва хотиржам ўтириб давомини ўқисангиз бўлади.
Хонтахта социологлари. Ўзларига қарашли доно фикр барча соғлом фикрлиларга хос деб ҳисоблашади. Сўз орқали ҳужумни бундай бошлашади: “Бу ҳақда барча якдил”, “Бунга ҳеч ким шубҳа қилмайди”. Фикрларига қўшилмаган барча сотқин, хоин, тентак ёки масондир.
Хонтахта экспертлари. Худди социологлар каби тактика қўллашади. Кўпинча, аллақандай ажнабий (Сэмюэлсон, Клифф Кёртс в.б. номини ҳеч ким эшитмаган) сиёсатшуносдан иқтибос келтиришга ўч.
Хонтахта аналитиклари. Таҳлилда, албатта, изчиллик, қонуният келтиришади. “- А воқеа рўй бердими? Ахир, ундан олдин Б ҳодиса бўлгандику. Б га қараб А юзага келишини олдиндан билиш қийин эмас. Мен аллақачон шундай бўлишини билгандим” ва ҳоказо..
Хонтахта футурологлари. Хонтахта аналитикларидан стажи ортиқ тоифа. Кечаётган воқеаларга қараб келажакни башорат қилишади. Масалан, фалон воқеа рўй берди. “-Энди Франция Ливияга киради. Қараб тур. Мени айтди дейсан”
Хонтахта конспирологлари. Бошини қаттиқ уриб олган ноёб шахслар. Барча сиёсий жараёнлар тенденциясидан ўзаро боғлиқлик ясашади. “-Бу Исроил ва Америка махфий плани. Барчаси улар манфаати учун ташкил этилган”. “-Йўғее”. “-Шундай”.”-Таиланд зоопаркида фил ўлибди”. “- Тсс. Бу Билдерберг клубининг иши”.
Хонтахта геополитиклари. Хонтахта конспирологларининг ривожланмай қолган тоифаси. “-Нега бу давлатга уруш очди?” “-Чунки қазилма бойлиги кўп, шуниям билмайсанми?”
Хонтахта тактиклари. Жаҳоннинг қизғин нуқталаридаги урушни муҳокама қилишади. “- Нега А режа бўйича урушмаяпти? Ҳа, чунки, қўмондонлари лапашанг. Йўқ, сотилган. Фалон давлатга сотилган. Аҳа! Ахир, Б режа бўйича урушиш керак!”
Хонтахта қуролшунослари. Урушаётган томонларнинг қурол-яроғини муҳокама қилишади “- Ҳмм. Бунисида Град, унисида Браунинг M2. Қаердан олиши мумкин? Тўхта, бу қурол фақат фалон давлат армиясида бор, демак....”
Хонтахта инженерлари. Хонтахта қуролшуносларига турдош тоифа. Гарчи Калашниковнинг ичини очиб кўрмаган, гуглга қарамай БТРдан БМПни фарқлай олмаса-да, ҳарбий аппаратлар ва иншоотларни худди ўзлари қургандек тавсифлашади. ИШИД ва Ғарб коалицияси, Россия аралашувига доир хонтахта жангларида алоҳида хизматларини таъкидлаш жоиз. Шимолий Кореянинг техникасини Ким Чен Индан кўра пухта билишади.
Хонтахта юристлари. Турли халқаро қонунлар ва конвенциялар ҳақида фикр юритишади. Масалан: Кечаги террор акти ҳақида Женева конвенциясида бундоқ ёзилган.
Хонтахта диншунослари. Муқаддас асарлар ва ривоятларнинг исталган еридан ўзлаштирилган иқтибос асосида ҳукм чиқара олишади. “Эшак ҳанградими? Демак таҳоратинг бузилди”.
Хонтахта тарихчилари. Таранг вазиятни тегишли тарихий ҳодиса билан қиёслашади. Масалан: Россия-Украина гибрид уруши Индонезия-Малайзия конфронтацияси билан..
Хонтахта шоҳидлари. Ҳар бир сиёсий ҳодисада ўзининг иштироки борлигини таъкидлайди. “Қарангки, айни шу куни Украинада эдим..”
Хонтахта ҳайбаракаллачилари. Оёқ остида ўралашиб кучли тарафни астойдил маъқуллайдиган хашаки тоифа. Вазият ўзгарганда эволюцияга учрайди. Аммо уларсиз ҳаёт давом этмайди, шундай эмасми?

Интернет материаллари асосида тайёрланди

25.08.2016

Родня (дорожные приключения)

Спешу. На работе установлены камеры. Чтобы не опоздать, нужно поймать такси. Но в последнее время бомбилы… ну сами понимаете. Причина моего беспокойство только и в этом.
Наконец, один из таксистов оглядываясь, словно разведчик, остановился:
- Эй, братишка, куда едем?
- Туда-то.
- А зовут тебя как?
- Абдушукюр.
- А работешь где?
- На нефтегазе.
- А проживаешь где?
- В Фергане.
- Садись… Я твой дядя, можешь называть меня Дода. Зовут меня Саидходжа. Ты мой племянник. Оба едем на Юнус-Абад. Если вдруг кто-то спросит…
Он вынул распечатанный на компьютере лист с подробными анкетными данными. Ого, тут все зафиксировано: от клички болонки до того, за какую команду он болеет!
По пути нас тормознула какая-та женщина. Видно, что она тоже долго простояла в ожидании.
- Вы моя младшая сестра. Едете со своим племянником, чтобы помочь ему в выборе портьер. Меня зовут Саидходжа. Абдушукур, объяснии невестке остальное, дай ей листок.
- Какая же она невестка, если она вам сестра? Получается, что она мне тетя, - возразил ему я.
- Ну, тут сами разберетесь.
Тут мы резко остановились у старушки, которая стояла в тени под чинарой. Что я говорю, какая тут тень чинары зимой?
- Салам алейкум, сынок. Зовут меня Фазилатхон, мне 66 лет, люблю похлебку с кислым молоком, отвези меня в Карасарай.
- Матушка, матушка моя, садитесь, как поживаете. А я люблю плов. Болею за Ювентус. Абдушукюр, помоги тете, возьми сумку.
- Что вы говорите, если она вам матушка, то мне приходится бабушкой!
- Матушка моя, отвезу вас в Карасарай, только через Юнус-Абад. Меня зовут Саидходжа.
Водитель снова в подробности рассказал свою авобиографию.
По дороге у нас в попутчиках побывали свояченица дяди, сват, а так же его двоюродный брат.
- Ой, как трудно стало, - начал сетовать водитель. – Штрафы установили в размере головы лошади. Останавливают, и по отдельности сержант с милиционером ведут допрос водителя с попутчиком: «Как зовут?», «Сколько лет?», «Где проживаешь?», «Сколько детей?», «Что ел на завтрак?».. Геморрой, одним словом… Те, кто стоят на дороге в Алмазар, спрашивают, какие блюда любишь. Если в ответах находят не соответствие, то сразу штраф двадцать пять минималок.
- Ну, вы тоже не слабак.
- Конечно, не слабак. Что, они нас останавливают?! Это ведь «ботиночники». Запомните, я ношу обувь 43 размера.

Перевод Аббас Асад 

29.07.2016

Акром Малик соч олдирганда

Акром Малик мана бу расмини саҳифасига қўйибди.

Тасаввур қилайлик, сайтлар буни қандай ёритган бўлар эди?

Kun.uz Таниқли ёш ижодкор Акром Малик сочини қириб олдирди
Daryo.uz Акром Абдулҳамид Малик сочини тақир олдириб, фейсбук тармоғига жойлади
BBC Uzbek Ўзбекистонда соч қўйиш дастакланмайди
Ozodlik radiosi Ўзбекистонда соч ўстириш тақиқланди
Islom.uz Соч олдириш одоблари
Darakchi.uz Акром Малик: мен сочимни нега олдирдим?
Uza.uz Истиқлол шарофати ила пешонамизга офтоб тегди
Sayyod.com Акромнинг сочи... йўқ! Шок!! Интрига!!!
Erkak.uz Миллиардер Акром Маликдан соч олдиришнинг ўн икки сири
Stadion.uz блоги “Соч қани, Акром?”
Olx.uz Продается б/у волосы. Посредникам не беспокоит. Акром.
Kh-davron.uz Йиғлаб-йиғлаб кетган соч..
Xabardor.uz Сочсиз бош тароватининг ўн хил жилоси акс этган йигирма дурдона сурат

PS: расм эгасидан сўраб олинди. Рухсат олиш осон кечмади. 
Янада қизиқарли изоҳларни ўқиш ва муҳокамада иштирок этиш учун ушбу саҳифага ўтинг.


21.05.2016

Серқирра мутахассис

“... қирқ ҳунар оз”   Ўзбек мақоли

Стол ортида катта одам ва 2-3та аёллар ястаниб ўтиришибди. Олдинда ёшроқ йигитча.
-          Бизнинг даргоҳда ишлаш осон, деб ўйлаяпсиз, шекилли?
-          Йўқ, йўқ..
-          Кўпчилик билан тил топишадиган, уддабурон бўлишингиз керак.
-          Албатта.
-          Биласизми, пахта қачон яганаланади, терилади?
-          Биламан. Пахта даласида ўсганман.
-          Хўш, белкуракни ишлатишни биласиз?
-          Қайси йигит белкурак ишлатмаган дейсиз.
-          Супургини-чи?
-          Бу нимага керак?
-          Супуриш учун, албатта. Миниб учмайсиз-ку.
-          Қаерни?
-          Кўчани! Хўш, биласизми?
-          Албатта! Талабаликда супур-сидир ишларини бажарганман.
-          Мен бекорга кўпчилик билан ишлаш тўғрисида эсламадим. Маҳалладан тўловларга пул йиғиш, турли рўйхатларни олиш ишларига қўл-оёғингиз чаққон бўлиши керак.
-          Уддалайман. Котиблик иш бўптими.
-          Маҳалла аёлларининг юриш-туришига кўз-қулоқ бўлиб туришга тўғри келади. бошдан оёқ, ҳўў, ҳалигидек, рўмолга бурканиб, жуда узун кийиниб юрганларни огоҳлантириб туриш зарур.
-          А-а?...
-          Жуда калта кийинганларни ҳам.
-          И-и...Нега?
-          Яқинда янги топшириқ бўлди. Аҳоли яшаш пунктларида турли оқимларга аралашган шахслар, чет элдаги жангариларга қўшилишни мақсад қилганларни тутиб келишга ҳам масъулмиз.
-          Мен карате ва қўл жангига қатнаганман. Приёмларимни кўрсатиб берайми? Хий-я-а-а!! Гдиш-бдиш!!
-          Етарли.
Шундай қилиб ёш ўқитувчи мактабга ишга қабул қилинди.
 2016 йил 9 январ

14.04.2016

Америкалик ота қизчасини ухлатяпти (ҳажвия)

Қизча: Дада, мен тушунмаяпман, нега биз Ироққа ҳужум қилдик?
Ота: Чунки уларда ОҚҚ - оммавий қирғин қуроллари бор эди.
Қизча: Лекин инспекторлар ҳеч қандай ОҚҚ топиша олмадику?
Ота: Чунки ироқликлар яхшилаб беркитиб қўйишган эди-да.
Қизча: Шунинг учун уларга ҳужум қилдикми?
Ота: Ҳа. Текширгандан мамлакатга кирган маъқулроқ.
Қизча: Ироққа киргандан кейин ҳам барибир ОҚҚ топа олмадикку
Ота: Бунинг сабаби улар қуролларини махфий жойга беркитиб қўйганлигида. Хавотирланма, биз барибир уларни топамиз.
Қизча: Ироқ бу қуролларни нима қилади?
Ота: Шуниям билмайсанми, қизим. Уруш қилади.
Қизча: Мен тушунолмаяпман – уларда қирғин қуроли бўлса нега биз билан урушганда қўллашмади?
Ота: Ҳмм... бунақа қуроллари борлигини атрофдагилар пайқаб қолмаслиги учун, ҳа шундай.
Қизча: Шунинг учун қуролни ишлатмасдан ўлиб кетишни афзал кўришдими?
Ота: Шундай бўлиб чиқяпти.
Қизча: Ахир, бу тентаклик-ку! Зўр қуроли бўлатуриб ишлатмасдан ўзини ўлимга отиш!?
Ота: Уларнинг маданияти шундай, қизим, барибир тушунмайсан.
Қизча: Сиздай кўп нарсани билмайман, лекин давлатимиз доим ироқликларда ОҚҚ борлигини айтади, аммо бунга ишонмайман.
Ота: Биласанми, уларда ОҚҚ бор-йўқлиги аҳамиятсиз. Ироққа кириш учун бошқа жўяли сабабимиз бор эди.
Қизча: Қандай сабаб?
Ота: Уларда қурол бўлмаган тақдирда ҳам Саддам Ҳусайн шафқатсиз диктатор эди. Шунинг ўзи Ироққа киришимизга арзийди.
Қизча: Нимага шафқатсиз диктатор бошқараётган мамлакатга бостириб кирилади?
Ота: Чунки у ўз халқига жабр-зулм етказади-да.
Қизча: Хитойдагига ўхшабми?
Ота: Йўқ, Хитой билан таққослама. Хитой бизнинг яхши иқтисодий ҳамкоримиз.
Қизча: Аммо уёқда миллионлаб одам арзимаган чойчақага меҳнат қиляпти-ку.
Ота: Аммо АҚШ корпорациялари бундан мўмай даромад оляпти.
Қизча: Демак, давлат америка корпорациялари фойда олиши учун ўз халқини эксплуатация қилса, эзса ҳам бу яхши давлат бўлаверадими?
Ота: Худди шундай, қизим.
Қизча: Ироқ халқига нимага зулм қилган?
Ота: Асосан, сиёсий сабабга кўра, масалан, ҳукуматни танқид қилганлиги учун қамоққа ташланган.
Қизча: Хитойда ҳам шундай қилишмаяптими?
Ота: Сенга айтдим-ку, Хитой бу бошқа масала, деб.
Қизча: Хитой билан Ироқ масаласида қанақа фарқ бор?
Ота: Масалан, Ироқни Баас партияси бошқарган, Хитойни эса коммунистлар.
Қизча: Доим коммунистлар ёмон дердингиз-ку.
Ота: Йўқ, Куба коммунистлари ёмон.
Қизча: Нимага улар ёмон?
Ота: Чунки улар ҳукуматни танқид қилган одамларни қамоққа ташлайди.
Қизча: Худди Ироқдагига ўхшабми?
Ота: Худди шундай.
Қизча: Худди Хитойдагига ўхшабми?
Ота: Сенга айтдим-ку, Хитой бизнинг шерик, Куба эса йўқ.
Қизча: Нимага Куба бизнинг ҳамкоримиз эмас?
Ота: 1960-йилларнинг бошида кубаликлар коммунистик йўлдан воз кечиб, биз каби капиталистик йўлни танламагунича улар билан савдо-сотиқ қилишни тақиқлаб ҳукуматимиз қонун чиқарган.
Қизча: Унда бу қонунни бекор қилиб Куба билан савдони бошласак, улар тезроқ капиталист бўлмайдими?
Ота: Гап шундаки, қизим, Кубада сўз эркинлиги йўқ, инсон ҳуқуқларига амал қилишмайди.
Қизча: Худди Хитойдагига ўхшаб-а?
Ота: Неча марта айтдим – Хитой тўғрисида оғзингга келганини айтма.  Қолаверса, Фидель Кастро худди Саддам Ҳусайн каби ҳарбий тўнтариш орқасидан давлат тепасига келган.
Қизча: Ҳарбий тўнтариш нима?
Ота: Бу шундай нарсаки, исёнчилар ёки генераллар биздаги каби эркин сайлов йўли билан эмас, куч билан ҳокимиятни олиб қўяди.
Қизча: Покистон ҳукумати ҳам ҳарбий тўнтариш орқали келмаганми?
Ота: Ҳмм... шунақа. Аммо Покистон бизга дўст.
Қизча: Покистонда ҳокимият ноқонуний бўлса, нега биз улар билан дўстлашамиз.
Ота: Мен Парвез Мушарраф Покистоннинг ноқонуний президенти демадим.
Қизча: Сиз, қонуний ҳукуматни куч билан эгаллаган ҳокимият - ноқонуний ҳокимият, деб айтдингиз.
Ота: Бу гап Саддам Ҳусайн ва Фидель Кастроларга тегишли. Парвез Мушарраф бизнинг дўстимиз, унинг ёрдами билан Афғонистонга кирдик.
Қизча: Биз Афғонистонга ўзи нега ҳужум қилдик?
Ота: 11 сентябр воқеасини уюштирганлари учун.
Қизча: 11 сентябрда улар нима қилган эди?
Ота: 19та одам, уларнинг 15 таси саудиялик, тўртта самоётни олиб қочган ва бизга қарашли биноларга урган. 3000 дан ортиқ америкалик ҳалок бўлган.
Қизча: Афғонистоннинг бу ерда нима дахли бор?
Ота: Толибон диктатураси даврида улар Афғонистонда тайёргарлик кўришган.
Қизча: Толиблар одамларнинг бошини, қўлини чопадиган қорасоқолли одамларми?
Ота: Ҳа, худди шундай. Одамларнинг қўли ва бошини кесишдан ташқари аёлларга ҳам зулм қилишади.
Қизча: 2001 йилда уларга Буш 43 млн ҳадя қилганмиди?
Ота: Ҳа, бу наркотикага қарши курашишганликлари учун мукофот эди. Толиблар афғонларга кўкнор ўстиришни тақиқлаб бизга зап ёрдам беришди.
Қизча: Қандай қилиб улар бунинг уддасидан чиқишди?
Ота: Жуда оддий. Ким ерида кўкнор ўстирса қўлини кесишди, бошини олишди.
Қизча: Демак, кўкнор етиштирганлик учун одамларнинг бошини ва қўлини кесса – яхши, бошқа ҳолатда – ёмон, шундайми?
Ота: Ҳа, шундай.
Қизча: Саудия Арабистонида одамларнинг бошини ва қўлини кесмайдими?
Ота: Кесади, аммо бу бошқа мавзу. Афғонистонда патриатхат тартиб ҳукм сурган, аёлларни камситишар ва ҳамиша чодрада юришга мажбурлашарди. Қонунни бузганлар тошбўронга тутиларди.
Қизча: Аммо Саудия Арабистонида ҳам аёлларни чодрада юришга мажбурлайдику.
Ота: Йўқ, у ерда аёллар анъанавий исломий урфда кийинишади.
Қизча: Буларнинг фарқи нима?
Ота: Саудиялик аёллар киядиган анъанавий исломий либос бу камтарона, аммо ярашиқли бўлиб, кўз ва бармоқлардан ташқари танани ёпиб туради.
Қизча: Чодра ҳам танани ёпиб туради. Ҳар хил номланишига қарамасдан фарқи йўққа ўхшайди.
Ота: Йўқ, чодрага ўраш бу эркакларнинг аёлларга тазйиқ ўтказишидир. Афғонлар билан дўстимиз Саудия Арабистони бир-бирига ҳечам ўхшамайди.
Қизча: Лекин, 11 сентябрь ҳужумини уюштирган 19 террорчининг 15 таси Саудиялик деб айтингиз-ку.
Ота: Шундай, аммо улар Афғонистонда машқ қилган.
Қизча: Уларни ким тайёрлаган.
Ота: Усама бен Ладен.
Қизча: У афғонми?
Ота: Йўқ, у асли Саудиялик. Аммо у жуда ёмон одам.
Қизча: У олдин бизнинг дўстимиз эмасмиди?
Ота: Афғонистондан советларни қувиб чиқараётган мужоҳидларга кўмаклашаётган давримизда дўст эдик.
Қизча: Советлар, Рейган айтганидай, ёвузлик салтанатими?
Ота: Худди ўзи. Аммо Совет Иттифоқи 90-йилларда тарқалиб кетган. Энди уларда ҳам сайловлар бор, капитализм бор, худди бизга ўхшаб. Уларни энди биз руслар деймиз.
Қизча: Руслар-чи? Улар бизнинг дўстимизми?
Ота: Йўқ. Улар совет тарқалгандан кейин бироз вақт дўстимиз бўлган. Ироққа киришимизни танқид қилгандан кейин аччиқланганмиз. Биз французлар ва немислардан ҳам аччиқланганмиз, чунки улар урушмай қараб туришган.
Қизча: Унда немислар ва французлар ҳам ёмонми?
Ота: Унчалик ёмон эмас. Аммо француз картошкасини қайта номлашга арзийди.
Қизча: Бирор мамлакат бизни олқишлаб турмаса, ҳамиша маҳсулотларнинг номини ўзгартирамизми?
Ота: Йўқ биз фақат дўстларимизга шу йўл билан норозилигимизни билдирамиз. Душманларга бўлса ҳужум қиламиз.
Қизча: Аммо Ироқ 80-йилларда дўстимиз бўлган-ку.
Ота: Ҳа, аммо, у сувлар оқиб кетди.
Қизча: Ўшанда Ироқни Саддам Ҳусайн бошқарганми?
Ота: Ҳа, лекин у Эрон билан урушган, шунинг учун вақтинча дўстлашганмиз.
Қизча: Нимага Эрон билан урушса дўстлашганмиз?
Ота: Чунки Эрон бизга душман эди.
Қизча: Ироқ курдларни газ билан заҳарлаганми, худди биз ҳиндуларни қирганимиздек?
Ота: Йиғиштир, бунақа гапни! Биринчидан, ҳиндуларни йўқотишга мажбур эдик, чунки улар янги ҳудудларни ўзлаштиришимизга халақит берган. Иккинчидан, Эрон билан урушаётган Ироққа дўстлигимизни англатиш учун кўзимизни юмиб турганмиз.
Қизча: Демак, кимдир душманимиз билан урушаётган бўлса, у дарров дўстимизга айланади, шундайми?
Ота: Шундай деса бўлади.
Қизча: Кимдир дўстимиз билан урушаётган бўлса, бизга душман, шунақами?
Ота: Одатда шундай. Аммо иккала томонга қурол сотиб мўмай даромад олса бўлади.
Қизча: Ахир, урушда одамлар ўлади-ку.
Ота: Аммо бу иқтисод учун фойдали, демак, Америка учун фойдали. Яратганнинг ўзи биз томонда. Худосиз антиамерикачи коммунист ким бўпти бизнинг олдимизда. Нега Ироққа ҳужум қилганимизни тушунгандирсан?
Қизча: Тушундим, шекилли. Чунки бу Худонинг иродаси, шундайми?
Ота: Ҳа.
Қизча: Ироққа ҳужум қилишимиз Худонинг иродаси эканлигини қаёқдан билганмиз?
Ота: Кўрмаяпсанми, доллар купюрасида “Умидимиз Худодан” деб ёзилган, Худо бизга мададкор. У Буш билан гаплашган, нима қилиш кераклигини айтган.
Қизча: Жорж Буш Худонинг овозини эшитганми?
Ота: Шундай деб айтган.
Қизча: Лекин унинг иқтидор кўрсаткичи паст-ку.
Ота: Паст бўлса ҳам эшитиш қобилияти бор.
Қизча: Демак, у Худонинг амрига бўйсуниб Ироққа уруш бошлаганми?
Ота: Ниҳоят ҳаммасини тушундинг. Энди кўзингни юмиб, ухлайқол.


Манба: orator.ru сайти Ш.Исломов таржимаси
(матндан фойдаланганда манбага фаол ҳавола беришни унутманг)